Nvidia enpresako zuzendaria ikertzen ari dira, espioi txinatar batekin izandako harremanagatik

Hiru osagaiko nazioarteko eskandalua: ustezko Txinaren espioitza, desleialtasuna eta enpresa-jarduera. Halaxe eman da Nvidia enpresa iparramerikarrean, adimen artifizialeko (AA) hardware eta softwarean liderrean: enpresako Administrazio Kontseiluak ikerketa independente bat ireki du. Antza denez, Jensen Huang kontseilari delegatuak harremanak izan zituen Alice Huang enpresari txinatarrarekin eta, Estatu Batuetako inteligentzia txostenen arabera, Txinako Gobernuaren espioia izan zen.

Konpainiaren Zuzendaritza Batzordeak jakinarazi duenez, "ikerketa independente bati ekin dio, Huang sortzaile eta zuzendari exekutiboa atzerriko inteligentzia operazio baten jomuga izan dela dioten informazioak direla-eta".

Komunikatua baino ordu batzuk lehenago, Axios hedabideak argitara eman zuen Jensen Huang enpresariak langileei igorritako mezua, emaztearekiko desleialtasuna aitortuz: "Nire ekintzek min egiten diete nire emazteari eta seme-alabei. Ez dago aitzakiarik egin dudana egiteko", zioen. Ondoren, The New York Times-ek jakitera eman zuen Trumpen gobernuak enpresari txinatarra seinalatzen zuela –Alice Huang gisa identifikatua eta Nvidiako zuzendariarekin harreman bat izan zuena– , Txinako Segurtasun Ministerioko espioi gisa.

Ameriketako Estatu Batuetako dokumentazioaren arabera, emakumea kontratatuta zegoen enpresariari buruzko datuak biltzeko. Pekineko espioitza agentzia handienaren helburua zen  AEBetako txipei buruzko informazio gehiago lortzea eta txip aurreratuenak Txinaren esku jartzeko eragina izatea.

Afera, kolpe berria enpresarentzat

Enpresaren esanetan, "ez dago arrazoirik pentsatzeko segurtasun nazionala eta Nvidiaren sekretuak arriskuan egon direla", eta "kontseiluak segurtasun nazionalari eta ekonomikoari ematen dio lehentasuna, Nvidiaren eta bere akziodunen interesetarako funtsezkoa baita".

Albistea baieztatu berri, konpainiaren akzioek %6 egin dute behera burtsan, eta urriaren hasieran izandako maximo historikoetatik % 26ko beherakada metatu dute. Hauteskunde emaitzek ere eragina izan zuten konpainian, demokraten garaipenak AA proiektuen garapena geldiaraz lezakeelako.