Kultur programazioa urte osoan zehar ereiten da EAEn, baina udazken-negua da sasoirik emankorrena

Kultura bizia da urte osoan EAEn, baina urtaro guztietan ez da berdin bizi. Kulturklikek 2024an jasotako ekitaldi guztiekin Saretzenek egindako azterketaren arabera, kultur programazioa nahiko modu orekatuan banatzen da urtaroen artean, nahiz eta udazken-negurako pixka bat gehiago programatu den, ekitaldien % 53,7 izan baitziren garai horretan.

Datu horrek hautsi egiten du eguraldi onarekin kultura-jarduera areagotu egiten den ideia orokorra, eta agerian jartzen du eremu itxietako kultura-ehuna sendoa dela: 3.757 kultur zentro, antzoki eta auditoriumek eusten diote programazioaren zati handi bati, aire zabaleko urtaroko jardueretatik harago. Izan ere, lau ekitalditatik hiru esparru itxietan egiten dira. Arabako bi eskualdek soilik dute estalietako ekitaldien proportzio txikiagoa eta aire zabaleko ekitaldien ratio handiagoa: Añanak eta Arabako Errioxak; izan ere, bertan, udaberri-uda sasoirako udan programatzen dira ekitaldi gehienak.

Kultur egutegia ez da berdina leku guztietan

Orokorrean orekari eusten zaion arren, eskualdeen arteko aldeak egon badaude. Eremu batzuetan programazioa batik bat uda sasoira bideratzen dute, eta beste batzuetan, aldiz, ekitaldiak hilez hil sakabanatzen dituzte.

Plentzia-Mungia, Markina-Ondarroa, Debabarrena eta Urola Kosta eskualdeetan, esaterako, ekitaldi gehiago izaten dira udaberri-udan. Aitzitik, Donostialdean, Arabako Lautadan eta Bilbo Handian, programazioaren zati handi bat eremu itxietan egin ohi da, eskaintza jarraitua dute eta jarduera udazken-neguan metatzeko joera dute.

Banaketa horrek erakusten du programazioaren atzean lurralde-logika bat ere badagoela: kultur azpiegitura gehien dituzten eremuetan jarduera-kopuru egonkorra izaten dute urte osoan; beste eskualde batzuetan, berriz, programazioak klimaren araberako egutegia izan ohi du.