Donostiako Zinemaldiak zinema besarkatuko du berriz
Zalantzaz josiriko garaiotan, eskertzekoak dira helduleku zenbait, segurtasun gutxi batzuk bederen. Bada, Donostiako Zinemaldiak ez du huts egingo urteroko hitzorduari, eta ostiraletik aurrera (21:00etan jarraitu ahalko da irekiera gala, eitb.eus-en eta ETB1en) hamaika mundutarako ehunka leiho irekiko ditu murrizketen ondorioz publiko gosez diren hiriko zinema aretoetan.
Palmaresa ezezaguna da, noski, oraingoz. Azken galan, irailaren 25ean, iragarriko ditu Urrezko eta Zilarrezko Maskorren (aurten aktoreentzako sarietan ez da sexu bereizketarik egingo) eta sari nagusien irabazleak Dea Kulumbegashvili iazko Urrezko Maskorraren irabazlea buru duen epaimahaiak. Baina jakina da dagoeneko bi izen handi 69. edizio honi lotuta egongo direla, Zinemaldiaren ohorezko saria, Donostia saria, jasoko baitute: Marion Cotillard eta Johnny Depp.
Marion Cotillard aktoreak (Paris, 1975) ostiralean bertan jasoko du Donostiako jaialdiaren saria, Elena Iruretak, Asier Etxeandiak, Anne Igartiburuk eta Cayetana Guillen Cuervok aurkeztuko duten galan. Cotillardek Oscarra, Urrezko Globoa eta BAFTA sariak eskuratu zituen La Môme / La Vie en Rose (Olivier Dahan, 2007) filmean Édith Piafena egiteagatik, eta, besteak beste, Michael Mann, Christopher Nolan, Woody Allen, Steven Soderbergh, Ridley Scott eta Leos Carax zinemagileekin egin du lan.
Saria emateko ekitaldiaren ondoren, Carlos Sauraren Rosa Rosae. La Guerra Civil film laburraren eta Zhang Yimou zuzendariaren Yi miao zhong / One Second film luzearen emanaldia dago programatuta.
Johnny Deppek (Owensboro, 1963), bestalde, irailaren 22an jasoko du saria, asteazkenarekin, 22:00etatik aurrera eitb.eus-en zuzenean jarraitu ahalko den gala batean. Hollywoodeko zinemaren egungo izar handienetakoa da Depp, eta 21 urte zituela A Nightmare on Elm Street (1984) filmean debuta egin zuenetik zinema garaikidearen zuzendari handienetako askorekin egin du lan oso film ezagunetan: Emir Kusturica (Arizona Dream, 1992), Lasse Hallström (What's Eating Gilbert Grape?, 1993; eta Chocolat, 2000), Tim Burton (Ed Wood, 1994; eta Sleepy Hollow, 1999), Jim Jarmusch (Dead Man, 1995) eta Terry Gilliam (Fear and Loathing in Las Vegas, 1998). XXI. mendean, Pirates of the Caribbean sagako Jack Sparrow kapitainaren interpretazioa dela-eta (2003, 2006, 2007, 2011 eta 2017), belaunaldi berrien mirespena ere lortu du Deppek.
Deppentzako sariaren aurkako kritikak egon dira hainbat elkarteren ahotan, emakumeen aurkako tratu txarren itzala gainean baitu aktoreak, baina Jose Luis Rebordinos Zinemaldiaren zuzendariak "errugabetasun presuntzioa eta birgizarteratzeko eskubidea" aldarrikatu zituen gutun batean, kritikei erantzunez, eta hau gaineratu zuen: "Eskuragarri ditugun eta frogatuta dauden datuen arabera, Johnny Depp ez dute atxilotu, akusatu edo zigortu ezein emakumeren aurkako eraso edo indarkeriagatik".
Sail Ofiziala
Euskal zinemaren ikuspegitik, film bat nabarmentzen da Sail Ofizialeko hogei tituluen artean: Maixabel, Iciar Bollainen lana, EITBren parte-hartzea duena. Urrezko Maskorra eskuratzeko lehian izango da Maixabel Lasaren, Juan Mari Jauregui ETAk hildako politikariaren alargunaren, eta senarra hil ziotenen arteko elkarrizketak pantailaratzen dituen pelikula.
Gainera, beste hainbat film interesgarri izango dira, hala nola Zhan Yimouren azken lana (lehiatik kanpo), Terence Davisen, Lucile Hadzihalilovicen, Fernando Leon de Aranoaren (El buen patrón, Javier Bardem protagonista dela) eta Claire Simonen azken lanak.
Euskal zinema
Maixabel Sail Ofizialean ez ezik, Heltzear Mikel Gurrearen film laburra ere izango da lehian, Zabaltegi-Tabakalera sailean, eta Zinemira euskal ekoizpenen sailean egongo dira ikusgai No somos nada, Aztarnak, Bolante baten historia, El radioaficionado, Erlauntza, Fantasía, Ilargi guztiak, Kuartk Valley, O gemer, Pandemic Tour 2020 Belako, Paperezko hegoak eta Kimuak katalogoko eta Itxitik deialdiko film laburrak.
Euskal zinemak, gainera, ohiko topagunea izango du Euskal Zinemaren Galan, irailaren 21ean, Victoria Eugenia antzokian, 22:30etik aurrera. Jai horretan, Kimuak euskal film laburrak hedatzeko programak Zinemira ohorezko saria jasoko du, eta Asier Altunak Hondalea filma estreinatuko du, Cristina Iglesias eskultoreak Santa Klara uhartean eginiko lanaren inguruko dokumentala.
EITBk Zinemaldian izango diren hamaika filmetan parte hartu du, eta, ohi duen legez, EITB Gala antolatu du (hilaren 22an izango da aurten). Gainera, "Irabazi arte" telesail berriaren lehen atala eskainiko du bertan. Euskarazko fikzioa da, gaztetxoentzat, eta nesken futbol talde baten bizipenak ekarriko dizkigu.
Izarrak nonahi
Aurten ere, hamaika aktore eta zuzendari ospetsu bertaratuko dira Donostiara. Batzuk aipatzearren, Marion Cotillard eta Johnny Depp sarituez gain, Javier Bardem, Jessica Chastain, Penelope Cruz, Charlotte Gainsbourg, Louis Garrel, Simon Rex, Sean Baker, Todd Haynes, Julia Ducournau, Audrey Diwan…
Zure interesekoa izan daiteke
Aitor Gabilondok torturari buruzko film bat zuzenduko du
Patria seriearen sortzaileak “kontakizuna osatzeko beharra” sentitzen du, “serieak zorretan nagoela sentiarazi eta gero”. EITB proiektuan parte hartzen ari da.
Petrus me fecit, Helena lapidem meum reflexa est
Zorteak zera eman dio Petrus zinema piezari: testura ezberdin bat, bene-benetakoa, plantak egiten ez dituena.
"Ander eta Yul" filma zaharberritu dute EITBk eta Euskadiko Filmategiak
Ana Diez zuzendari nafarraren Ander eta Yul (1988) filma zaharberritu dute Euskadiko Filmategiak eta EITBk. Boloniako Zinematekaren menpeko L’Immagine Ritrovata laborategietan aztertu eta eskuz konpondu dute, aurretik, besteak beste, Tasio filmarekin egin zen moduan
Oliver Laxek instalazio bat erakutsiko du Tabakaleran
"HU/هُو.Bailad como si nadie os viera" instalazioak Sirāt filmaren sorkuntza prozesua, ikerketa lana eta grabazioak ditu oinarri. Uztailaren 16an aurkeztuko du Laxek bera, Donostian.
Nouvelles Vagues jaialdiak izarren dirdira piztuko du Biarritzen
Biarrizko zinema jaialdiaren 4. edizioa ekainaren 23tik 28ra egingo dute kostaldeko hirian. Kristen Stewart zuzendari eta aktorea izango da epaimahaiko burua, eta Los Javisek, Xavier Dolanek, Monica Belluccik, Marion Cotillardek eta Isabelle Huppertek parte hartuko dute.
Zinegoak LGTBQ+ jaialdiak 40 film baino gehiago izango ditu Sail Ofizialean
Ekainaren 22tik 29ra bitartean egingo den Zinegoak Bilboko LGTBIQ+ zinema eta arte eszenikoen jaialdiak 40 film baino gehiago izango ditu Sail Ofizialean. Gainera, kulturarekin eta sexu-, identitate- eta genero-aniztasunarekin lotutako 50 jarduera baino gehiagorekin beteko du Bilbao.
Zinemaren Jaia, Hegoaldeko zinema aretoetan bueltan
Ekainaren 8tik 11ra, 3,5 eurokoa izango da zinemarako sarreren prezioa. Ipar Euskal Herrian, Fête du Cinéma ekainaren 28tik uztailaren 1era izango da.
Aurtengo Kimuak katalogoko film laburrak aukeratu dituzte
Zazpi film labur hauek hautatu dituzte euskal film laburrak sustatu eta zabaltzeko: ‘Aho beltza' (Alba Lozano), 'Al otro lado' (Pablo Esteo, June San Sebastián, Leyre Fernández, Antton Gorroño, Leire Martínez, Irune Aguirreazaldegui eta Javier Martínez), 'Bitartean, gero' (Raúl Barreras), 'Hemen gaude' (Sébastien Boulard), 'High River' (Daniel Alegrete), 'Joare Tte' (Ekaitz Bertiz) eta 'Los Divulgators' (Pablo Hernando Esquisabel).
“Tamara ta Mara” euskarazko fikziozko telesail berria estreinatu dute Primeran plataforman
“Tamara ta Mara” umorez beteriko euskarazko fikziozko telesaila da, komedia zoro eta feminista bat. EITBren ‘Formatu txikiak, Talentu berriak’ deialdiaren barruan garatu den bigarren telesaila da. Bilboko Azkuna Zentroan estreinatu ostean, Primeran plataforman dago jada ikusgai.
Cannes, ispilu beltz murgiltzailean
Eta zeren bitartez sorgintzen gaituzte Carltonen Méliès aztiaren ondorengo sortzaile-teknologoek? Errealitate birtualarekin, errealitate areagotuarekin, erreala ez den errealitatearekin, errealitate mistoarekin, existitzen ez diren arren gure begi betaurrekodunen aurrean forma hartzen duten ikuskizun paregabeekin.