Aldarrikapen politikoek ez dute Oscarren bataila irabazi

Oscar sarien 98. edizioak One Battle After Another kutsu politiko argiko filma tronuratu du bart, baina aldarrikapen politikoak salbuespena izan dira alfonbra gorrian eta agertoki gainean, besteak beste Rob Reinerren eta Robert Redforden heriotzak gogora ekarri dituen gala arin eta hunkigarrian.

Javier Bardem espainiar aktoreak egin du, 3.000 gonbidaturen aurrean, galako hitzaldirik argi eta kritikoena. Alfonbra gorrian bertan garbi utzia zuen Bardemek bere konpromisoa, soinean “Gerrari ez” zioen pegatina eta Palestinan bakea ezartzearen aldeko intsignia zituela agertu baita.

“Gerrari ez, eta Palestina askatu”, adierazi du gero Bardemek agertoki gainean, nazioarteko pelikula onenaren saria aurkeztea egokitu zaionean.

David Borenstein Mr. Nobody Against Putin dokumental sarituaren zuzendariak ekarri du gaueko beste une hunkigarri bat. Agertokira igo denean, gizatasunaren aldeko hitzaldia egin du.

“Herrialde batzuetan, izar iheskorren ordez, bonbak eta droneak jaurtitzen dituzte. Gure etorkizunaren izenean, gure seme-alaba guztien izenean, gelditu gerra hauek, orain!”, esan du Borensteinek indartsu, publikoaren txalo zaparrada eragin duen diskurtso batean.  

Gero, Paul Thomas Andersonek “mundu eroa” uzten ari garela esan du, gidoi egokitu onenaren Oscar saria jasotzeko orduan, baina itxaropentsu agertu da hurrengo belaunaldiek “mundura argi apur bat” ekarriko ote duten. 

Gala zirraragarria

Conan O’Brien izan da zeremonia gidatzeko arduraduna, eta irriei, emozioari eta kritika pitin bati egin die bide. 

Autumn Durald Arkapawren garaipenak, Sinners filmari esker sarien 98. edizioan emakume batek lehenengoz argazkilaritzaren Oscarra irabazteak, jendea zutiaraztea eragin du, golardoa emakume guztiekin partekatu nahi izan du eta. 

“Zuek gabe, ez nengokeen hemen”, esan du Dolby antzokiko esku zarten artean. 

Aurten hil diren artistei egindako omenaldia ere galako une gorenetako bat izan da, batik bat Rob Reiner zuzendaria eta Robert Redford aktore, zuzendari, ekoizle eta ikonoa oroitzeko tarteak. 

Barbra Streisandek hitz maitekorrak eskaini dizkio laguna zuenari, eta The Way We Were Oscarra irabazi zuen abestiaren txatal bat abestu du, Sydney Pollacken izen bereko filmean pantailakide izan zuen adiskidearen omenez. 

Billy Criystal komedianteak hartu du hitza Reiner goraipatzeko. Abenduan hil zuten zinemagilea Hollywooden itzal handiena zuen eragileetako bat zela adierazi du, eta haren konpromisoa azpimarratu.