Nortzuk dira Ahal Duguren buruak Hego Euskal Herriko hiriburuetan?

Lander Martinez informatika ingeniaria, Fernando Iglesias Soziologian eta Zientzia Politikoetan lizentziatua, Hannot Sansinenea Claro que Podemos hautagaitzaren sustatzailea eta Oscar Gresan ingeniaria izango dira Ahal Duguren buruak Bizkaiko, Arabako, Gipuzkoako eta Nafarroako hiriburuetan, hurrenez hurren.

Abenduaren 26tik 31ra Internet bidez Espainiako Estatuko 770 udaletan egin duten bozketa prozesuan hautatu dituzte.

Bilbo

Argitaratutako datuen arabera, Lander Martinez "Bilbao pentsatzen" hautagaitzaren burua aukeratu dute Ahal Duguren Bizkaiko hiriburuko arduradun izateko, botoen % 45,32rekin.

Bilbon bizi den gasteiztar hori informatika ingeniaria eta Zientzia Politikoen ikaslea da.

Diego Guerinek (% 23) eta Yolanda Martinezek (% 31) aurkeztutako hautagaitzei gailendu zaie Martinez.

Azaldu duenez, asanblada bat antolatuko du udal-hauteskundeetan aurkeztu ala ez erabakitzeko, eta Bilboko Udaleko gastu publikoaren auditoria egin dadin lan egingo du.

Bestalde, argi adierazi du Podemosen Estatuko zuzendaritzaren planteamenduak bere egiten dituela.

Gasteiz

Gasteizen, Fernando Iglesias Garcia Denok Elkarrekin hautagaitzaren burua izendatu dute idazkari nagusi, botoen % 54,3ren babesarekin.

Iglesias Zientzia Politikoetan eta Soziologian da lizentziatua, eta bost urtez ikasi du Gasteizko Arte eta Lanbide Eskolan.

Gasteizko Udaleko herritarren arretarako zerbitzuen proiektuko buru, Lanbideren ikerketa soziologikoen gidari, Egailanen kalitate saileko arduradun eta Gauekoak Elkarteen Federazioko kultur egitasmoaren zuzendari ere izan da.

Iglesias bost hautagai gehiagoren aurretik geratu da bozketan, eta irabazle suertatu ostean adierazi duenez, Podemosen lerro ofizialaren iritzikoa den arren, udal gaietan alderdiko jarraitzaileek hartuko dituzte erabakiak.

Bestalde, datozen egunetan asanbladak antolatuko omen ditu maiatzeko udal-hauteskundeetan aurkeztu ala ez erabakitzeko.

Donostia

Donostian, Hannot Sansinenearen Claro que Podemos hautagaitza (Pablo Iglesiasen babesa duena) izan da irabazle botoen % 61,11ko babesarekin, eta Juantxo Iturria (%36,21) eta Juan Antonio Hernando (% 2,67) atzetik geratu dira.

Iruña

Oscar Fresan 32 urteko Telekomunikazio ingeniaria izan da, bestalde, Iruñeko Ahal Dugun bozkatuena, 286 botoren babesarekin. Era berean, herritarren kontseilua eta beste hamahiru udalerritako barne eragileak ere aukeratu dituzte.

Erkidegoetako zuzendaritzak

Udaletako barne antolakundea aukeratzeko prozesuaren ostean, Ahal Duguk erkidegoetako zuzendaritzak aukeratzeko prozesua jarriko du abian urtarrilaren 7an. Otsailaren 14ra arte luzatuko da eta orduan iragarriko dituzte izenak.

*Argazkiak: Ahal Dugu