Ertzaintzak hiru gazte kondenatuak atxilotu ditu 'herri harresian'

Ertzaintzak Ibon Esteban, Igarki Robles eta Aiala Zaldibar gazteak atzeman ditu gaur, Auzitegi Nazionalaren agindua beteta, horien atxiloketa oztopatzeko Gasteizko Andre Maria Zuriaren Plazan eratutako "herri harresia" indarrez desegin eta gero. Hirurak Zaballako espetxean sartu dituzte, 19:00ak inguruan.

Auzitegi Nazionalak sei urteko espetxe zigorra ezarri zien gazteoi maiatzaren 6an, Segiko kide izatea egotzita. Guztira zazpi gazte kondenatu zituen, baina horietako lau egun horretan bertan atxilotu zituzten. Beste hirurak (Esteban, Robles eta Zaldibar) Gasteizko Andre Maria Zuriaren Plazan izan dira atzotik, ehunka pertsonak babestuta.

Erresitentzia pasiboa eta baketsua eginez, Ertzaintzak kondenatuak atxilotzea oztopatzea izan dute helburu plazara bertaratutakoek.

Hori horrela, gutxienez Ertzaintzaren 18 furgoneta joan dira plazara gaur goizean, eta "herri harresia" osatu duten 150-200 pertsonak arrastaka atera dituzte, banan-banan.

Operazioa tentsio handikoa izan da. Izan ere, gazteek erresistentzia pasibo irmoa egin dute, eta ertzainek indarra eta borrak erabili dituzte. Ondorioz, hainbat pertsona zauritu dira, 60 inguru, eta horietako batzuk ospitalera eraman behar izan dituzte. Gainera, Segurtasun Sailak esan du 17 izan direla zauritutako ertzainak.

Esteban, Robles eta Zaldibar gazteez gain, Ertzaintzak beste 12 pertsona atxilotu eta beste hiru inputatu ditu, agenteei erasotzea eta aurre egitea egotzita.

EAEko Polizia autonomikoa 07:45ean iritsi da plazara, eta 09:00etan ekin dio "herri harresia" desegiteari. Une horretan, 150-200 pertsonak osatzen zuten, eta agenteek bi ordu eta erdi behar izan dituzte kondenatuak atxilotzeko.

Besteak beste, "euskal gazteria aurrera", "ez gaituzue atxilotuko" eta "zuek faxistak, zarete terroristak" aldarriak oihukatu dituzte gazteek.

Atxiloketen ostean, 100dik gora pertsonak elkarretaratzea egin dute Espainia Plazan, polizia operazioa salatzeko.

"Martxa laranja"

Giza harresia atzo abiatu zuten Andre Maria Zuriaren plazan. Aldez aurretik, manifestazioa egin zuten, "eskubide zibilen eta politikoen" alde eta espetxe zigorron aurka.

Hainbat ordezkari politikok deialdiarekin bat egin zuten, tartean Hasier Arraiz Sortuko presidenteak eta EH Bilduko hainbat kidek eta datozen hauteskundeetarako hautagaik.

'Disidente izaten jarraituko dugu'

Manifestazioaren ostean, jasotako "babesa, berotasuna eta elkartasuna" eskertu zuten antolatzaileek, eta salbuespen politikak bertan behera gera dezaten, borrokan jarraitzeko deia egin zuten.

"Ez dugu onartzen euskal herritarrak atxilotzen, torturatzen eta espetxeratzen jarraitzea; disidente izaten jarraituko dugu", ohartarazi zuten.

Halaber, "gatazka politikoa konpontzeko urrats praktikoak" behar direla azpimarratu zuten. "Espetxeak husteko garaia da", nabarmendu zuten.

Erreakzioak

Hasiera Arraiz EH Bilduren legebiltzarkide eta Sorturen presidenteak "gordintasun osoarekin" salatu ditu atxiloketak, eta "berriro Espainiako Estatuaren errepresio estrategiaren betearazle gisa jokatzea" egotzi dio EAJri.

Ezker abertzalearen buruzagiak azaldu duenez, "gaur, zoritxarrez, kamiseta ugari odolarekin zikindu dituzte justifikaezina den poliziaren indarkeriaren ondorioz". Gaineratu duenez, "batzuk iraganeko eskenatokietara eraman nahi gaituzte, injustuak diren zigorrekin gure gazteriaren etorkizuna hipotekatu nahian, atxiloketa arbitrarioekin, eta soberan dauden iraganeko jarrera eta estrategiekin".

Bestalde, Roberto Uriarte Ahal Dugu Euskadiren idazkari nagusiak argi adierazi nahi izan du bere alderdiak ez duela "zerikusirik Segiren, Bilduren eta indarkeriaren oinordekoen munduarekin", baina "poliziaren indarkeria" gaitzetsi du.

Azkenik, Gorka Maneiro UPyDren legebiltzarkideak 'herri harresia'n parte hartu dutenen "jarrera onartezina, antidemokratikoa eta indarkeria" salatu du.