Forcadell ez da berriro Kataluniako Parlamentuko presidente izango

Carme Forcadellek (ERC) uko egin dio berriro ere Kataluniako Parlamentuko presidente izateari; izan ere, prentsaurrekoan ostegun honetan azaldu duenez, "garai politiko berriak" eskatzen du "epaiketarik ez duen pertsona bat". Halaber, Ganberaren burujabetzaren alde egin duen lana nabarmendu du, eta esan du baimendu duela "parlamentu-eztabaida egotea, zentsurarik gabe".

"Harro esan dezaket aurre egin diogula zentsurari , ez dugula etsi, eta tinko eutsi diegula gure beharrei, hau da, parlamentu-eztabaida bermatzeari", esan du Forcadellek Kataluniako Parlamentuan. Baieztatu duenez, jarraituko du diputatu moduan, ERCrekin, eta ez du politika utziko, nahiz eta Parlamenteko presidentetzan ez jarraitzeko erabaki pertsonala hartu duen.

Forcadell auzipetuta dago, egun, eta behin behineko askatasunean, matxinada egotzita, Auzitegi Gorenak bideratutako auzi batean; haren iritziz, Ganberako presidente berriak ez luke izan beharko inolako loturarik auziren batekin. Esan duenez, ez daki zein ekimen aurkeztuko diren hastear dagoen legealdi berrian.

Presidente berriak, Forcadellen iritziz, "Kataluniako Parlamentuaren burujabetzaren alde egin beharko du"; une honetan, alderdi independentistak eztabaidatzen ari dira ea aukerarik dagoen, Araudia ikusita, Carles Puigdemont modu telematikoan inbestitzeko.

"Zentsurari noizbait atea irekitzen badiogu, ezin izango dugu ate hori itxi; erakunde honen buruan dagoenak bermatu behar du kaleko eztabaida guztiek aukera izatea Ganberan ere egoteko", esan du.

Ekimen- eta adierazpen-askatasunaren aldeko lana

Forcadellek Parlamenteko presidente moduan egindako lana goraipatu du, eta esan du Ganberaren burujabetzaren alde egin izan duela beti: "Ekimen- eta adierazpen-askatasuna defendatzeko lan egin izan dut, dagokion moduan jardun dut", nabarmendu du.

Espainiako Gobernuak eta Estatuak berak ez dute nahi "hitza eta elkarrizketa" protagonista izatea; horren aurrean, Forcadellek adierazi du aurreko legealdiko "erronka nagusia" Parlamenteko burujabetzari eustea izan zela; bere iritziz, hala egin zuten, 155. artikuluak Ganbera deuseztatu zuen arte.

Dena dela, Forcadellek onartu du hainbat "marra gorri" gainditu zituztela, ikuspegi politiko batetik ikusita, eta akatsak egin izateko aukera dagoela; izan ere, gauzak "beti ahal dira hobeto egin".

Forcadellek ez du "jarduera politikorik" baloratu nahi izan, esate baterako Puigdemonten balizko inbestidura telematikoa, eta aseguratu du inork ez diela eskatu Ganberako abokatuei aukera horren gaineko txostenik, ez berak ez parlamentu-talderen batek.

Ziklo baten amaiera

Parlamentuko presidentzia legealdi "labur, ez ohiko, bizi eta tentsio handi" baterako onartu zuela aitortu du, eta karguan berriz errepikatzeari uko eginda "zikloa" ixten duela esan du.

Bestalde, abenduaren 21eko hauteskundeak baino lehen etorkizunari buruzko gogoeta eginda zuela esan du, eta kargua uzteko aukera "esan beharreko pertsonari esan ziola" gaineratu du.

Era berean, bere burua Kataluniako Gobernu berriaren barruan ikusten ote duen galdetuta, Forcadellek esan du "oraingoz" ERCko diputatu gisa baino ez dela ikusten.