EAko militanteek estatutuak bete eta primarioak deitzeko eskatu diote Eba Blancori

Eusko Alkartasuneko (EA) gaur egungo zuzendaritzarekin jarrera kritikoa duten militanteek alderdiaren estatutuak bete eta primarioak deitzeko eskatu diote Eba Blanco jarduneko idazkari nagusiari. Izan ere, larunbatean beteko da EAko estatutuek jasotzen duten bi hilabeteko epea idazkari nagusia aukeratzeko primarioak deitzeko, eta Eba Blancok "oraindik ez die afiliatuei data jakinarazi".

Ohar batean, Jose Luis Soldevilla Gipuzkoako, Nafarroako eta Arabako lurralde koordinatzaileen abokatuak ohar batean adierazi duenez, "suposatzen da Eba Blanco alderdiaren estatutuak errespetatuz aukeratu dutela jarduneko idazkari nagusi, eta ez ebazpen judizialari iruzur eginez".  

Hala, Soldevillak ohartarazi duenez, primarioak deitu ezean, "epailearen agindua ez betetzeko maniobra izan liteke Eba Blancoren aukeraketa". "Ebazpen judizialak errespetatu egiten dira, baina ez dira betetzen. Iruzur argia da”, gaineratu du Soldevillak, idazkari nagusi izateko asmoa duen Maiorga Ramirez hautagaiaren abokatuak.

Eba Blanco iaz, azaroaren 18an, izendatu zuten jarduneko idazkari nagusi, eta, EAren estatutuen arabera, bi hilabeteko epean primarioak deitzea da jarduneko idazkari nagusi gisa izendatutako pertsonaren eginkizun bakarra.

"Alabaina, estatutuak bete eta militantziari ahotsa emateko behin eta berriz egin dizkioten eskaerei erantzun gabe, Eusko Legebiltzarreko gaur egungo presidenteordeak ez ditu primarioak deitu oraindik, alderdiaren estatutuetan jasotakoa eta lurralde batzarrek eta militanteek eskatutakoa mespretxatuz", esan dute militanteek.

Afiliatuek gogora ekarri dutenez, azaroaren 11n, ebazpen judizial baten bidez, "Eba Blanco EAko idazkari nagusi izendatzearen eraginkortasuna bertan behera geratu zen". Hurrengo egunean, agindutakoa berehala betetzea erabaki zen.

"Agindu judizialari entzungor egiteko maniobra argian, azaroaren 18an, EAko Batzar Nazionalak jarduneko idazkari nagusi izendatu zuen Eba Blanco, agindu horri entzungor eginez. Alegia, ebazpena ez betetzeko eta auzitegiei kasurik ez egiteko erabakia hartzen du", aurpegiratu diote.

Nolanahi ere, Blancok "ezin du bere behin-behinekotasuna betikotu", adierazi dute, eta, testuinguru horretan, primarioak deitzeko bi hilabeteko epea duela gogoratu dute. "Larunbat honetan amaitzen da epe hori, eta EAko militanteek ez dute horren asmoen berri. Argi dago EAko afiliatuek aukeratu behar dutela alderdiko idazkari nagusia, eta Eba Blancori dagokio primarioak deitzea militantziari ahotsa emateko", azpimarratu dute.

Horrenbestez, Eba Blancok bitartekotasuna ez luzatzeko eta alderdiari egonkortasuna emateko interesa izan beharko lukeela uste dute militanteek.