Eusko Jaurlaritzaren ustez, alarma egoera amaitzeak ez du "kaosa" ekarriko

Josu Erkoreka Eusko Jaurlaritzako bozeramaileak adierazi du “ohiko” legediak elementu nahikoak eskaintzen dituela koronabirusaren pandemiari erantzuteko, eta alarma egoera luzatu ez eta krisiaren kudeaketa autonomia erkidegoen esku gelditzekotan, “kaosa” zabalduko den ustea okertzat jo du.

Gobernu Kontseiluaren ondoren, Eusko Jaurlaritzako bozeramaileak errepikatu egin du azken asteetan autonomia erkidegoetako presidenteek egin dituzten bileretan Iñigo Urkullu lehendakariak esan dituen hitzak: pandemiaren aurka borrokatzeko giltzarriak Administrazio Zentralaren eta autonomikoen arteko “kokudeaketa” eta “koordinazioa” izan behar dira.

Asteazkenean Madrilgo Diputatuen Kongresuan alarma egoera berriz luzatuko ote den edo ez bozkatuko dutela eta, Erkorekak adierazi du alarma egoeraren balizko amaierak ez duela “kaosa” ekarriko.

Hori dela eta, Erkorekak deitoratu du pandemiaren aurrean alarma egoera ezartzea erabaki zutenetik Espainiako Gobernuaren kudeaketaren ardatza “zentralizazioa” eta autonomiei dagozkien eskuduntzak bere gain hartzea izan direla.  

Eusko Jaurlaritzaren bozeramaileak okertzat jo du sektore politiko batzuek pandemiari aurre egiteko orduan zentralismoa “eraginkortasunaren sinonimo” dela pentsatzea, ahots horiek berek uste baitute gai hori autonomia erkidegoen esku uzteak “kaosa, desgobernua eta deskontrola” ekarriko lukeela. “Ezin dugu halako planteamendurik babestu”, adierazi du. 

Estatu autonomikoak 40 urte egin eta gero batzuek oraindik horrelako jarrerak izatea deitoratu du Erkorekak, ez baitute onartu autonomia erkidegoek kudeaketa publikoa eta, hain zuzen ere, osasunaren erabilera “eraginkorra” egiten dutela.

“Fase berria”

Eusko Jaurlaritzaren bozeramaileak beste gai batzuk hartu ditu hizpide, hala nola, Euskadik, Espainiako Gobernuak diseinatutako deseskalatze prozesuan, egungo “zero fasetik” “bat fasera” pasatzeko aukera.   

“Fasea aldatzeko behar diren parametroen barruan gaude. Nahikoak dira aurrerapauso bat emateko”, esan du Erkorekak, abisatu aurretik konfinamenduaren biguntze neurriak modu “ezberdinean” aplika litezkeela eskualde batzuetan eta besteetan.