EH Bilduk eta Sortuk "bere" egin dute ETAren biktimen mina: "Ez zen inoiz gertatu behar"
EH Bilduk eta Sortuk "bere" egin dute astelehen honetan ETAren biktimen mina, eta "ez zela inoiz gertatu behar" esan dute. "Bake justu eta iraunkorrerako bidea egiteak biktima guztien aitortza eta erreparazioa eskatzen du, guzti-guztiena. Ez dugu haietako bat bera ere ahazten", esan dute.
Arnaldo Otegi EH Bilduko koordinatzaile nagusiak eta Arkaitz Rodriguez Sortuko idazkari nagusiak adierazpen "solemnea" plazaratu dute Aieteko Konferentziaren hamargarren urteurrenaren eta ETAren indarkeriaren amaieraren harira. Horretan, ETAren indarkeriak eragindako biktimen aipamen berezia egin dute.
"Gure egiten dugu haien mina, eta sentimendu zintzo horretatik baieztatzen dugu hura ez zela inoiz gertatu behar, inork ezin du gogoko ukan hura guztia gertatu izana, ezta denboran hainbeste luzatu izana ere. Aietera lehenago iristea lortu behar genuen", dio adierazpenak.
"Zoritxarrez, iraganak ez dauka atzera bueltarik, esan dezakegun ezerk ez du eragindako mina ezabatuko", adierazi dute, baina "konbentzituta gaude arintzea behintzat posible dela, errespetuan, adeitasunean eta memorian oinarrituta". Ildo horretan, jasan duten sufrimendua ahal duten neurrian arintzeko konpromisoa hartu dute.
Bestalde, ETAk indarkeriaren amaiera iragarri zuenetik hamar urte igarota, konpromiso hura osorik bete dela esan dute. "Haren jardueraren amaiera osoa eta erabatekoa izan da". Gainera, armagabetze eta desegite prozesua modu egokian egin dutela esan dute, "nazioarteko estandarrek zehazten duten bezala".
"Halako prozesuak zailak izaten direla aintzat hartuta, balioa aitortu behar zaio ETAk bere erabakiak batasunez hartu izanari. Antzeko ezaugarriak dituzten beste prozesu batzuetan gerora sortu izan diren arazo larriak agertzea saihestu baitu horrek", adierazi dute.
Edonola ere, "zalantzarik gabe, euskal gizarte osoarena da arrakasta", azpimarratu dute.
Horren harira, iruzurrik ez zela egon, eta ez zela kalkulu taktiko bat izan aitortu dute. "Euskal ezker independentistak bide soilik baketsu eta demokratikoekiko hartutako konpromisoak konbentzimendu etiko eta politikoei erantzuten zien eta erantzuten die", azaldu dute. "Aldatu ezineko eta betirako erabakia da. Ezker independentistak egiaztatu du egindako apustuaren zintzotasuna eta emandako hitzaren betetzea", gaineratu dute.
Halaber, preso politikoen auziari irtenbidea ematea erronka saihetsezina dela azpimarratu dute, eta horretarako salbuespenezko espetxe politika amaitzea eta konponbide integrala ematea beharrezkoa dela uste dute.
"Aldarrikatu nahi dugu presoek estrategia armatua gainditzeko izandako parte hartze aktibo, irmo eta erabakigarria, baita bide baketsu eta demokratikoekiko haien konpromisoa ere. Haiek gabe, ez zen posible izango", esan dute.
Amaitzeko, elkarrizketaren, negoziazioaren eta adostasunaren aldeko konpromisoa berresten dutela adierazi dute, "hori baita ezberdintasun politikoak ebatzi eta konpontzeko metodo eraginkor eta demokratikoena".
Gainera, "gatazkaren jatorrian dagoen arazo politikoari irtenbidea emateke dugu oraindik", horien hitzetan. "Herri bat gara, nazio bat, eta neurri horretako aitortza eta errespetua dagokigu. Gure nazio nortasunarekiko errespetua beharrezko eta lehen pausoa da bestelako etorkizuna eraikitzeko, zeinetan erabakia gure herriko gizartearen esku egongo den", azaldu dute.
Albiste gehiago politika
Albaresek "geroratze-taktikak" ikusten ditu EBn euskararen ofizialtasunari buruzko erabakia berriro atzeratzean
"Hori eragotz dezakeen argudio teknikorik ez dagoela jakinda, atzean arrazoi politikoak ez ote diren galdetzen hasi naiz, baina lehenago edo geroago, inolako zalantzarik gabe, gaindituko ditugu", adierazi du Atzerri ministroak Radio Euskadin egindako elkarrizketan.
Tortura delituaren definizioa nazioarteko estandarretara egokitzeko eskatu dio NBEko Giza Eskubideen Batzordeak Espainiako Estatuari
Alde horretatik, Batzordeak mekanismo independente bat eratzea eskatu du, segurtasun-indarren tortura- eta tratu txar-salaketa guztiak ikertzeko, eta deitoratu du delitu horrek 15 urterekin preskribatzea.
Busturialdea-Urdaibai eskualdeak 303,4 milioi euroko inbertsioa jasoko du
Eskualdeko ekonomia-, gizarte- eta hiri-garapena sustatzen duten hainbat proiektu garatuko dira. Autzagane-Muxika errepidea hobetzea eta Bermeoren eta Muxikaren arteko bidegorri-sarea handitzea dira horietako batzuk.
Ibone Bengoetxea: "Europa ezin da eraiki bere aniztasuna ukatuz"
Ibone Bengoetxea lehendakariorde eta Kultura eta Hizkuntza Politikako sailburuak azpimarratu du euskara hizkuntza bizia dela, euskal herritarrena eta Europako ondarearen zati bat, eta gogorarazi du Europa ezin dela eraiki bere aniztasuna ukatuz. Hala, berretsi du Europan euskararen ofizialtasuna lortzeko Jaurlaritzak esparru guztietan lan egiten jarraitzeko borondate irmoa duela, eta inplikatutako erakunde guztien ahalegin diplomatikoa eskertu du.
Europar Batasuneko herrialdeek katalanaren, euskararen eta galizieraren ofizialtasunari buruzko bozketa atzeratu dute
Hainbat herrialdek adierazi dutenez, "oraindik ez da une egokia" hizkuntzen ofizialtasuna onartzeko, eta alderdi politiko, ekonomiko eta juridikoei buruzko zehaztasun gehiago eskatu dute.
Burgos-Gasteiz abiadura handiko trenaren aurreneko zatiaren eraikuntza esleitu dute
Azpiegitura horrek abiadura handiko sarearekin eta Atlantikoko korridorearekin lotuko du Euskal Autonomia Erkidegoa (EAE). Halaber, Arkauteko lotunea eraikitzeko proiektuaren idazketa esleitu da ere bai.
Ultraeskuinaren gorakadak eskatzen du “erreakzio nazional handi bat” eta agenda kontrajarria mahai gainean jartzea, Otxandianoren arabera
Pello Otxandiano EH Bilduko Legebiltzarreko bozeramailearen iritziz, ultraeskuina borroka kulturala irabazten ari da eta horren aurrean "erreakzionatu" egin behar da, eta "agenda erreakzionario" horri agenda "demokratizatzailea, ezkerrekoa" kontrajarri.
Cristobal Montoro inputatuta dagoen ustelkeria sarearen gakoak: komisioak gas-enpresei laguntzeko legeen truke
Orduko Ogasun ministroak sortutako abokatu bulegoak "influentzia sare" bat sortu zuen, ustez, dirua biltzeko, gutxienez bost konpainiaren interesen aldeko legeak egitearen truke.
Albiste izango dira: Euskararen ofizialtasuna Europan, indarkeria matxistaren erradiografia eta Donostiako Jazzaldia
Gaurkoan albiste izango direnen laburpena, bi hitzetan.
EBko ministroak euskararen, katalanaren eta galizieraren ofizialtasuna aztertzen ari dira
Luxenburgok, Poloniak eta Frantziak diote oraindik ez dela "une egokia" hizkuntzen ofizialtasuna onartzeko, eta zehaztasun gehiago eskatzen dituzte arlo politiko, ekonomiko eta juridikoei buruz.