Politikarien erreakzioak EH Bilduk eta Sortuk ETAren biktimei buruz egindako adierazpenaren harira

Euskal Herriko eta Espainiako politikako ordezkariek euren iritziak plazaratu dituzte goizean EH Bilduko koordinatzaile nagusi Arnaldo Otegik eta Sortuko idazkari nagusi Arkaitz Rodriguezek ETAko biktimek jasandako minari egindako aitortzaren ostean. 

EAJren Euzkadi Buru Batzarraren ustez, EH Bilduk emandako pausoa "txikia eta eskasa" da, eta ezker abertzaleak ETAk egindako kaltea "bidegabea" ez dela esan izana deitoratu du ohar batean.

EBBren ustez, ezker abertzalearen adierazpenak "bi foliotan eta bost puntutan, ekarpen positiboak jasotzen ditu elkarbizitza berri bat eraikitzeko eta ETAren biktimei erreparazioa emateko, baina aipatu gabe uzten ditu hainbat gako nagusi, zeinetan ezker abertzaleak eta talde armatuari babesa eman zion munduak ibilbide etiko eta politiko luzea egiteke duten".

PSEko Eneko Anduezak ontzat jo du ezker abertazleak emandako urrats "erabakigarria" eta benetakoa eta ezker abertzalearen ibilbidean "mugarri" izatea espero du.  

Pilar Garrido, Podemos Euskadiko Koordinatzaile Nagusia eta Unidas Podemosen diputatua pozarren agertu da ezker abertzaleak "ETAko biktimen sufrimendu aitortzeko pausoa eman" izanagatik. 

Isabel Salud Ezker Anitza-IUko koordinatzaileak adierazi du EH Bilduk eta Sortuk gaur emandako urratsa "ezinbestekoa" dela "normalizazio eta bizikidetza prozesuaren bidean".

Eusko Alkartasunak, bestalde, "indarkeria mota guztiek eragindako biktima guztiak" aitortzeko unea dela azpimarratu du. "Biktima guztiek merezi dute memoria, justizia eta erreparazioa", zehaztu dute.

Carlos Iturgaiz Euskadiko PPko presidenteak, ostera, "txantxa makabro" deritzo EH Bilduren adierazpenari eta Otegik "biktimei barre egiten" diela uste du. 

PSNk azpimarratu du lehen aldia dela ezker abertzaleak ETAren biktimek jasandako mina aitortzen duela. "Aurrerapauso demokratikoa da, baina oraindik asko dago egiteko ETAren biktimen eta haien familiei oroimena, justizia eta erreparazioa bermatzeko", ohartarazi du.

UPNk, berriz, Otegik barkamenik eskatu ez duela nabarmendu du. "Bere samina adierazi izana iruzurra izango da, adierazpen hori ez badago ekintzez lagunduta eta oraindik argitu gabe dauden 300 hilketa baino gehiago argitzen laguntzeko borondaterik erakusten ez badu", erantsi du.

Nafarroako Alderdi Popularreko presidente Ana Beltran, Arnaldo Otegiri zuzendu zaio zuzenean eta "demokraziarentzako lakra" dela esan dio. 

Patxi Lopez lehendakari eta PSOEren Memoria Demokratikorako idazkariak azpimarratu duenez, Arnaldo Otegi ezker abertzaleko buruak ETAk eragindako sufrimendua publikoki aitortuta, "iraganean sostengatzaile gisa izan zuen paperari zuzenketa moduko bat egin zaio", esan du. Lopez lehendakari zen ETAk indarkeria behin betiko utzi zuela iragarri zuenean.

Bestalde, Ione Belarra Podemoseko idazkari nagusi eta Espainiako Gobernuko ministroak adierazi duenez, ezker abertzaleak emandako "aurrekaririk gabeko" urratsaren aurrean, uste du "demokratek urratsa onartu behar" dutela. 

Pere Aragones Generalitateko presidenteak aitortu du, "ezker abertzalearen adierazpena garrantzi eta erantzukizun handikoa" dela, eta, ETAk indarkeriaren amaiera iragarri zuenetik 10 urte beteta, bake prozesu historikoan beste urrats bat dela esan du. "Bakea eta hitza dira bidea", azpimarratu du, eta Generalitateak "datozen urteetan bake prozesu hau laguntzeko konpromisoa" berretsi du.

Gabriel Rufian ERCko diputatuak ezker abertzalearen iragarpenak sortuko dituen erreakzioak aipatu ditu, "pertsona onak eta txarrak bereiziko dituzte erreakzio horiek" haren ustez; ezker abertzaleak emandako urratsa ospatu du: "Gaur egun handia da", ziurtatu du.

EH Bilduk egindako urratsa "garrantzitsua eta beharrezkoa" dela adierazi du Iñigo Errejon Mas Paiseko diputatuak bere kontu pertsonalean.

Jorge Buxade eurodiputatu eta Vox-eko Ekintza Politikoko Batzordeko bozeramaileak ez ditu sinetsi Arnaldo Otegi EH Bilduko koordinatzaile nagusiak biktimen "sufrimenduari" buruz esandako hitzak, eta dei egin dio "argitzeke dauden ETAren 300dik gora kasuak" argitzen lagundtzera.