Unidas Podemosek eta ERCk neurri progresista gehiago eskatu dituzte, eta eskuinak Sanchez gogor kritikatu du

Estatuaren egoerari buruzko eztabaida Pedro Sanchezen iragarpenarekin abiatu da, goizean, Kongresuan: enpresa energetikoei eta banketxeei zerga bereziak ezarriko dizkietela agindu du. Arratsaldeko saioan, PP, Vox, Unidas Podemos eta ERC alderdietako bozeramaileek hartu dute hitza. Gainerako talde parlamentarioen agerraldiak asteazkenean izango dira.

Cuca Gamarra Alderdi Popularreko idazkari nagusiak gogor kritikatu du Pedro Sanchez Espainiako Gobernuko presidentearen kudeaketa eta, besteak beste, inflazioari eta krisi energetikoari aurre egiteko neurri eraginkorrik aurkeztu ez izana egotzi dio. "Frankenstein Gobernuak ez du gehiagorako ematen, porrot egin du eta bere proiektua agortuta dago", adierazi du.  

Hitzartzea hasi aurretik, Gamarrak minutu bateko isilunea egin du ETAren biktimen oroimenez, eta, ildo horretan, PSOEren eta Unidas Podemosen koalizio-gobernuak EH Bildurekin egindako itunak salatu ditu.  

Inflazioari dagokionez, PPk prezioen etengabeko gorakadari aurre egiteko hainbat neurri proposatu dituela eta Gobernuarekin elkarlanean aritzeko prest agertu dela azaldu du, baina Sanchezek laguntza ukatu diola deitoratu du.

Horrez gain, Espainiako Gobernua "zatituta" dagoela iritzi dio. "PSOE eta Unidas Podemos beraien arteko desadostasunak bideratu nahian dabiltza, espainiarren arazoez kezkatu beharrean", salatu du.

Gauzak horrela, Gamarrak uste du Sanchezek ezarri dituen politika sozialak ez direla egokiak izan eta Espainia presidente kargua hartu zuenean baino "okerrago" utziko duela.

Santiago Abascalen (Vox) arabera, Espainiaren egoera "oso larria" da eta "okerragoa izan daiteke Pedro Sanchezek Gobernuan jarraitzen badu". Horrenbestez, Alderdi Popularrari eskua luzatu dio koalizio-gobernuaren alternatiba eraikitzeko.

Sanchezek erakundeak "bere interes pertsonalen eta ideologikoen arabera" erabiltzen dituela salatu du eta legegintzaldia "txarra" izan dela erantsi du.

"Suntsitzen duten guztia berriro eraikiko dugu eta botatzen duten guztia berriro altxatuko dugu: ekonomiatik hasita, gurutzeetaraino", azpimarratu du.

Ildo horretan, Abascalek iragarri du Memoria Demokratikoaren Legearen kontrako helegitea aurkeztuko duela Voxek.  

Horrez gain, Alberto Nuñez Feijoo PPko buruzagiari zuzendu zaio eta esan dio eztabaida ideologikoak ez direla hutsalak. Areago, ezkerrak bere agendarekin aurrera egin ez dezan, konfrontazio ideologikoa ezinbestekoa dela adierazi du.

"Irmotasunez jokatuta soilik lortuko dugu alternatiba erreal bat eraikitzea eta espainiarrek eskatzen dutena gauzatzea: Gobernu hau  eta bere politikak kanporatzea", nabarmendu du PPri Espainiako Gobernua eskuratzeko elkarlanean aritzeko eskua luzatuz.  

Bestalde, Unidas Podemosek Pedro Sanchezek gaur goizean iragarritako neurriak nabarmendu ditu, eta "ezkerreko bidetik" jarraitu dezala eskatu dio.

Pablo Echeniquek eta Jaume Asensek hartu dute hitza Unidas Podemosen izenean. "Badakigu burugogorrak garela, baina gauzak ondo egiten direnean ere aitortzen dugu", esan du Echeniquek.

"Ausardiaz jokatzeko eta ezkerretara bira emateko eskatu genizun, eta Gobernuak posible egin du orain arteko ezinezkoa zirudiena", azpimarratu du Asensek.  

Echeniquek bide horretatik jarrai dezala galdegin dio Sanchezi eta hurrengo Aurrekontuetan, besteak beste, ondoko neurriak ezartzea proposatu dio: 10.000 milioi euroko diru-funtsa osasun sistema eta hezkuntza publikoa indartzeko; ordaindutako zazpi eguneko baimena senideen zaintza-lanetarako; eta lanbide arteko gutxieneko soldata berehala igotzea.  

Halaber, ezkerreko politikak ezarrita, koalizio-gobernua indartsuagoa dela ziurtatu du, "askok haustea nahi badute ere".

Horrez gain, Asensek esan du Espainiak neurri sozial gehiago behar dituela, eta ez gerrarako dekretuak. "Gastu militarra handituz ez dira prezioak murriztuko, ezta herritarren bizi-baldintzak hobetuko ere", ohartarazi du.

Gabriel Rufian ERCko bozeramaileak ere positibotzat jo ditu Sanchezek iragarritako neurriak, baina azpimarratu du ez dela nahikoa konpainia elektrikoei eta bankuei zerga bereziak jartzea, eta, beraz, premiazkotzat jo du zerga-sistema berri bat ezartzea.  

"Pobreziaren aurkakoa ez da aberastasuna, justizia da, eta justizia ez da aldi baterako, ezta ezohikoa ere", adierazi du.

"Herrialde honetan familiek gutxiago ordaindu behar dute eta enpresa handiek gehiago", iritzi dio.

"Presidente jauna, desberdintasuna klaseen arteko borroka da eta borroka hori langile klaseak galtzen du beti. Ahal den guztia egingo duzula esan duzu, bada, egin dezagun zerga-sistema berri bat justizian oinarrituta egongo dena", proposatu dio Rufianek Sanchezi.

Halaber, politikari independentistak Alderdi Popularrak arlo honetan egin duen proposamena kritikatu du: "Espainian zerga asko ordaintzen dira, bai, baina ez dituzte 100.000 euro kobratzen dutenek ordaintzen, baina zerga gehienak zuek kontuan hartzen ez duzuen langile-klaseak ordaintzen ditu".  

Horrez gain, Rufianek ohartarazi du egungo egoera sozioekonomikoa Sanchezek esandakoa baino larriagoa dela eta azken urtean elikagaien prezioak zenbat garestitu diren azaldu du adibide moduan. "Jendea gaur duela urtebete baino 3.000 euro pobreagoa da", deitoratu du.

"Hori da zure nazioaren egoera. Jendeari ez zaio axola Kongresuan esaten dena, baizik eta supermerkatuan ordaindu behar dutena", erantsi du.

Horrenbestez, legeak eta proposamenak egiterakoan anbizio handiagoarekin joka dezatela eskatu die Rufianek PSOEri eta Unidas Podemosi.