EH Bilduk uste du eraginkortasun energetikoari buruzko eztabaidak "ustekabean" hartu duela Jaurlaritza

EH Bilduren ustez, Eusko Jaurlaritzaren eta Espainiako Gobernuaren artean eraginkortasun energetikoaren eztabaidaren inguruan sortu den "ika-mikak" agerian uzten du eztabaida horrek ustekabean hartu duela Arantxa Tapiak zuzentzen duen saila. Alderditik azpimarratu dutenez, beti agertu dira ildo horretan neurriak "lehenbailehen" aplikatzearen alde.

Alderdi subiranistak ohar batean adierazi duenez, horren erakusgarri da duela hilabete batzuk Eusko Legebiltzarrari helarazi zion interpelazioa, "Jaurlaritzak hasieran gutxietsi egin zuena, orain erabiltzen ari den aitzakia berberarekin, hamarkadak daramatzatela arlo horretan lanean". Horren arabera, "ezker subiranistaren ekimenez hasi zen EAEn eraginkortasun energetikoaren proposamena lantzen, eta ez Tapia sailburuaren borondate edo ekimenagatik".

"EH Bildu beti izan da energia eraginkortasunera eta kontsumoa murriztera bideratutako neurriak bultzatzearen aldekoa", gaineratu du, klima aldaketaren aurkako borrokan "funtsezko" elementua delako.

EH Bildu neurri "estrukturalen" eta "premiazkoen" alde agertu da baina, esan duenez, erakundeetan landutako eta aurkeztutako proposamenak "ez dituzte aintzat hartzen Eusko Jaurlaritzak eta hura osatzen duten alderdiek".

Azkenik, EH Bilduk uste du energia gastua kontrolatzeko neurriak egon behar direla: "energiaren prezio altua energia kontsumoa kontrolatzera bideratutako neurria da, baina neurri hori guztiz insolidarioa da; izan ere, baliabideak dituztenek mugarik gabe ordain dezakete, eta ez dituztenek, ordea, ezin dira sarritan ordaintzera iritsi".

Azpimarratu du baliabide gutxien dituzten pertsonak "aspaldi" ari direla eraginkortasun energetikoko neurriak praktikan jartzen "baliabide ekonomiko gutxi dituztelako". Era berean, Tapia sailburuari gogorarazi dio egiturazko neurriak direla eraginkorrenak, baina galdetu dio ea non dauden "Eusko Jaurlaritzaren neurri horiek".