"Herrialdeari egonkortasuna emango dion eta elkarrizketa lehenetsiko duen" gobernua osatu du Sanchezek

Goizean zehar tantaka aurreratutako izen-abizenak baieztatu ditu eguerdian Pedro Sanchez Espainiako presidenteak. Nabarmendu duenez, elkarrizketa eta akordioak gakoa izango dira legealdi honetan, eta osatutako gobernuak "egonkortasuna emango dio herrialdeari". 

Moncloan eguerdian egin duen galderarik gabeko agerraldian, Sanchezek 22 gizon-emakumeen "profil politiko altua" goraipatu du hainbat aldiz. Euren ardurapeko gaiak kudeatu ez ezik, "akordioak lortu eta publikoki azaltzeko" gaitasuna ere badute denek ere, horren ustez. 

Era berean, gobernu berriak izango duen ikuspegi "feminista nabarmena" aipatu du buruzagi sozialistak. Aurrekoetan bezala, emakumeak izango dira nagusi (12), eta lau presidenteordeak ere andrazkoak izango dira. 

Sanchezen hitzetan, arlo ekonomikoan eta estatu ministerioak diren horietan —atzerri, barne, defentsa eta justizia arloetakoak— bide beretik jarraituko du gobernu berriak. Halaber, politika sozialen aldeko apustua egiten jarraituko dutela azpimarratu du, etxebizitza arloan eta gazteei zuzendutako neurriekin. 

22 ministerio eta 4 presidenteordetza

Asteburuan bolo-bolo ibili da Sanchezek departamentu gutxiagoko exekutiboa osatu nahi zuela, baina azkenean ez du asmoa gauzatu. Horri esker, Sumarrek bost ministerio izango ditu bere gain (gaur egun, Unidas Podemosek dituen berberak). 

Izen berrien artean, bik hartu dute protagonismoa: Elma Saiz nafarra Gizarte Segurantzako Ministerioan kokatu du Sanchezek. Bestalde, askoren ustez lurraldetasunaren legegintzaldia izango den honetan, Kanarietako presidente izandakoak, Angel Victor Torresek, hartuko du Ministerioaren gidaritza. 

Gobernu berriak lau presidenteordetza izango ditu. Izan ere, Nadia Calviño, Yolanda Diaz eta Teresa Riberaz gain, Maria Jesus Montero jarduneko Ogasun ministroa laugarren presidenteordea izango da. 

Gobernu parekidea izango da, 12 emakumek eta 10 gizonek osatutakoa. 

Karguan jarraituko dutenak

Felix Bolaños orain arte Presidentzia, Gorteekiko Harreman eta Memoria Demokratikoko ministroa izan denak zituen zereginei eutsi, eta Justizia Ministerioa erantsiko die. Hala, "superministrotzat" har daiteke —Presidenteordetzarik ez badu ere—, kabineteko pisu politiko handiena duen Ministerioaren jabe izango baita. 

Jose Manuel Albaresek Atzerri, Kooperazio eta Europar Batasuneko ministro izaten jarraituko du. Margarita Roblesek Defentsa Ministerioan errepikatuko du, eta Luis Planasek, Nekazaritza, Arrantza eta Elikadura ministro gisa. Fernando Grande-Marlaskak Barne Ministerioko buru jarraituko du. 

Isabel Rodriguez ministro izango da legegintzaldi honetan ere (bozeramailea eta Lurralde Politikako buru izan da orain arte), baina bi ardura berrirekin: Etxebizitza eta Hiri Agenda.

Hori horrela, Pilar Alegria izango da eledun berria, Hezkuntza eta Lanbide Heziketa Ministerioari eutsita eta Kirolak gehituta. 

Jose Luis Escrivak Inklusio, Gizarte Segurantza eta Migrazio ministro izateari utziko dio, baina zeregin berriak izango ditu Gobernuan: bera izango da Transformazio Digitalerako ministro berria. 

Nadia Calviñok, Maria Jesus Monterok eta Teresa Riberak euren ministerioen buru jarraituko dute (Gai Ekonomikoak, Ogasuna eta Trantsizio Ekologikoa, hurrenez hurren). 

Diana Morant Zientza ministroak Unibertsitateen ardura ere hartuko du. 

Yolanda Diaz Sumarreko buruzagia gobernuko bigarren presidenteorde eta Lan ministroa izango da beste lau urtez. 

Bost ministro sozialista berri, tartean Elma Saiz

Elma Saiz (orain arte PSNko bozeramailea zena Iruñeko Udalean eta aurrez Nafarroako Gobernuko Ekonomia eta Ogasun kontseilari izandakoa) Gizarte Segurantzako ministro izendatuko dute. 

Irene Monteroren ordez, Ana Redondo Garcia aukeratu dute Berdintasun ministro. Valladolideko Kultura eta Turismo zinegotzi ohia da Redondo, eta epaile lanean ere jardun du. 

Iturri berberen arabera, Angel Victor Torres Kanarietako presidente ohia Lurralde Politika eta Memoria Demokratikoko ministro berria izango da, eta Jordi Hereu Bartzelonako alkate izandakoak Industria Ministerioaren ardura hartuko du. 

Oscar Puente diputatu eta Valladolideko alkate izandakoa Garraio ministro izango da. 

Sumarren bost ministerioak

Pablo Bustinduy Podemoseko diputatu izandakoak eta gaur egun Sumarreko kide denak Ione Belarra eta Alberto Garzonen lekua hartuko du, biek zituzten ardurak bereganatuko baititu: Eskubide Sozial, Kontsumo eta Agenda 2030eko ministro izango da. 

Monica Garcia, Mas Madrideko diputatua, izango da Osasun ministro berria. Sira Rego IUko eurodiputatuak Haurtzaroa eta Gazteria ministerio berriaren ardura hartuko du. 

Azkenik, Ernest Urtasun En Comuren eurodiputatu eta Sumarren bozeramailea Kultura ministro izango da. 

Sanchezen agerraldia amaitu eta berehala mezua zabaldu du Yolanda Diaz Sumarren buruzagiak. Adierazi duenez, bere alderdiko lau ministroek "euren onena emango dute herrialdea aldatzeko eta jendearen bizitza hobetzeko".

Podemos: "Sanchezek eta Diazek Gobernutik kanporatu gaituzte"

Podemos Sumarren baitan badago ere (5 diputatu ditu Kongresuan), ez du lekurik izango gobernu berrian. Pablo Fernandez eta Isa Serra talde moreko bozeramaileek agerraldia eskaini dute "akats larria" salatzeko. Euren ustez, Nacho Alvarez Podemoseko kidea ministro proposatzea Diazen "trikimailu baldarra" baino ez zen izan, eta Diazek eta Sanchezek exekutibotik "kanporatu" dituztela kritikatu dute.