Okupatutako Mendebaldeko Saharara bisita egitea debekatu die Marokok Eusko Legebiltzarreko ordezkariei

Eusko Legebiltzarreko hiru diputatu buru dituen ordezkaritza bati Mendebaldeko Saharan sartzea galarazi diote Marokoko agintariek. Delegazioaren helburua zen sahararren egoera ezagutzea, eta sakatu dute debekua ordezkari publiko gisa dituzten eskubideak "zapaltzea" dela.

Mikel Arruabarrena (EAJ), Amancay Villalba (EH Bildu) eta Jon Hernandez (Sumar), Eusko Legebiltzarreko Berdintasunerako eta Garapenerako Lankidetzarako Batzordeko kideak, Euskal Fondoko ordezkariekin batera, Aaiunera joan dira hegaldian, okupatutako Mendebaldeko Sahara bisitatzeko asmoz, baina Marokoko Poliziak hegazkinetik jaistea debekatu die.

Legebiltzarkideek Kanaria Handiko Las Palmaseko hotel batean emandako prentsaurrekoan azaldu dutenez, Marokoko agintariek Aaiungo aireportuan lur hartu ostean izan duten jarrera "guztiz onartezina" izan da. Izan ere, azpimarratu dute Espainiako Gobernuaren Kanpo Arazoetako Ministerioak bisitaren berri behar bezala eman zuela, eta hegazkina helmugara iritsi den arte inork ez diela inolako trabarik jarri.

Ez da Marokok horrelako bisita bat eragozten duen lehen aldia. Legebiltzarreko ordezkarien arabera, atoan eta inolako azalpenik gabe itzularazi dituzte, eta horregatik "Marokoren jarrera lotsagarria eta onartezina" salatu dute.

EH Bilduren legebiltzarkideak adierazi duenez, Mendebaldeko Saharan sartzen saiatu ziren aurreko aldian ere ez zieten sartzen utzi, baina orduan salaketa formala aurkeztu zuten. Esan du "oraindik oso goiz" dela, "gertakariak gaur bertan gertatu direlako". Hori dela eta, gertatutakoa aztertzeke dago.

Hernandezek, Arruabarrenak eta Villalbak Espainiako Kanpo Arazoetako Ministerioari eskatu diote Marokoko Erresumari "beharrezko azalpen guztiak" ematea exijitzeko.

"Marokoko okupazio-gobernuak asko du ezkutatzeko, eta horregatik ez digute sartzen utzi (Saharara)", ziurtatu du Sumarren legebiltzarkideak.

Eusko Legebiltzarreko ordezkaritza horrek Euskal Fondoarekin egindako bidaiaren helburuak dira sahararren autodeterminazio eskubidea aldarrikatzea, giza eskubideen urraketa "etengabeak" salatzea eta berriki Europar Batasuneko Justizia Auzitegiak Saharari dagokionez Europar Batasunaren eta Marokoren artean sinatutako merkataritza-akordioak legez kanpokotzat jotzen dituen epaia betetzea.