Gazarako beste martxa bat "bideraezina" dela uste du Podemos Euskadik, baina beste aukera batzuk aztertzen ari dira

Podemos Euskadiren esanetan, "bideraezina" da Gazara beste Martxa Global bat egitea, "huts egindako ekintza bat errepikatzea" litzatekeelako, baina "ekintza desberdin batzuk eta Gazara beste leku batzuetatik sartu ahal izateko aukerak" aztertzen ari dira, Maite Gartzia alderdi morearen koordinatzaileak adierazi duenez. 

Gartziak prentsaurrekoa eman du ostiral honetan Donostian, Alberto Villarreal Podemos Euskadiko Osasun arduradunarekin batera. Biak ere Kairora joan zen euskal ordezkaritzako kide izan ziren, laguntza humanitarioa Gazara sartu eta "blokeoa hausteko" Rafah-rainoko martxan parte hartu asmoz. 

Biek ala biek Egipton bizi izan zituzten egoera ezberdinak kontatu dituzte. Bertan, ekintzaile asko atxilotu edo atxiki zituzten, eta batzuk deportatu egin zituzten. Hori dela eta, ezinezkoa izan zen 52 nazionalitatetako 4.000 pertsona mugitu zituen martxa hori buruarino eramatea, Vila-realek nabarmendu duenez.

Gartzia oso kritiko agertu da Espainiak Egipton duen enbaxadorearen jokabidearekin. Harekin bilera bat izan zuten, kontatu duenez: "Bilera oso txarra izan zen, patetikoa. Bere jarrera, ikaragarria. Une oro bota zigun errua martxa baketsu hartara joan ginenoi eta 'ez zenuten etorri behar' esaten zigun. Eta 'ez zenuten etorri behar' horrekin igaro zituen bileraren bi orduak. Bai, kritika sendoa egin nahi diot pertsona horri, ustez ordezkatzen gaituelako, eta ez genuen batere, baino, batere babesik jaso, ez konplizitaterik", salatu du.

Gartziak adierazi duenez, bere alderdia aztertzen ari da Gobernuari kexa bat aurkeztea enbaxadorearekin gertatutakoagatik.

Villarrealen hitzetan, hasieran bazirudien Egiptok "begi onez" ikusten zuela martxa, izan ere "beharrezko baimenak eskatu ziren eta ez zituzten ukatu inongo momentutan", eta Egiptoko hedabideek ere "zerbait positibotzat" jo zuten.

"Argi dago Egiptoko Gobernuak ez zuela asmorik martxa hori egitea onartzeko, ez orduan, ez gaur, ez bihar, ezta hilabete barru ere. Egiptoko Gobernuak oso harreman onak ditu Israelgoarekin, eta gu han traba ginen bientzat", azpimarratu du.

Martxa hori posible izan ez den arren, "elkartasun eta aktibismo sare oso garrantzitsua" sortu dela azpimarratu du," etorkizunerako oinarri sendoa ". "Gazako genozidioa agerian utzi dugu, eta Palestinako herriari erakutsi diogu haiekin gaudela", azpimarratu du Gartziak.

Zaila ikusten dute "ezaugarri berdinekin eta leku beretik sartuz martxa bera" berriro egitea.

"Oraintxe bertan bideraezina izango litzateke, zeren, Egiptoko Gobernuaren jarrera ikusita eta poliziaren parteteik jasan dugun jazarpen guztiarekin, huts egindako ekintza bat berriro errepikatzea litzateke. Horregatik, beste ekintza batzuk eta beste toki batzuetatik sartu ahal izateko beste saiakera batzuk baloratzen ari dira", adierazi du.