Santos Cerdanek Senatuko ikerketa batzordean gezurra esan ote zuen ikertuko du Madrilgo epaile batek 

Santos Cerdan PSOEko Antolakuntza idazkariak behin-behineko espetxealdian jarraitzen duen bitartean, Madrilgo epaile batek ikerketa abiatu du 'Koldo auzia'ri buruz Senatuan egiten ari diren ikerketa batzordean testigantza faltsua eman ote zuen ala ez argitzeko. Epailearen arabera, buruzagi sozialista ohiak esandakoaren eta errealitatearen artean "alde argia" dago. 

 

Madrilgo instrukzioko 24. epaitegiko epaileak uste du Cerdanek ez zuela egia esan 2024ko apirilaren 30eko agerraldi hartan. Pasa den ekainean, PSOEko Antolakuntza idazkari zenak dimisioa eman zuen eta diputatu akta ere utzi egin zuen, legez kanpoko eskupekoak jaso omen zituelako, lan publikoak esleitzearen truke.

 

EFE albiste agentziak eskuratu duen autoaren arabera, instrukzio epaileak tramitera onartu du Hazte Oir erakunde ultrakatolikoak Cerdanen aurka testigantza faltsuagatik aurkeztutako kereila. 

 

Halaber, instrukzio epailea Kongresuari ere zuzendu zaio Cerdanek diputatu aktari uko egin zion egiaztatzeko. 

 

Autoaren arabera, ikerketa batzordean kontatu zuenaren eta errealitatearen arteko aldea "agerikoa eta begi bistakoa da", Guardia Zibilaren UCO unitateak egindako txostenaren edukia ikusita. 

 

Magistratuaren ustez, zantzuak daude gezurra esan zuela, adierazi baitzuen 2021etik 2023ra ez zela Koldo Garciarekin (Espainiako Garraio Ministerioko aholkulari izan zena) harremanetan jarri, ez zekiela hark bitartekari gisa jardun zuenik maskarak erosteko, ez ziola jarraibiderik eman enpresa jakin batzuei mesede egiteko, eta ez zuela enpresekin harremanik izan zuzenean zein zeharka.