Lehendakaria: "Sanchezek orain arte eman ez dituen azalpenak eman beharko ditu, gardentasunez"

Imanol Pradales lehendakariaren aburuz, "oso larria" da Pedro Sanchez presidentearen eta Espainiako Gobernuaren inguruan gertatzen ari den guztia. Lehendakariak uste du Espainiako presidenteak "zentzua eman" behar diola legealdiari. Horregatik, gonbita egin dio, "hauteskundeak iritsi arte bidea egin nahi badu", datorren astean Diputatuen Kongresuan daukan agerraldian "gizalegez eta gardentasunez" aritu dadila, eta eman ditzala "orain arte eman ez dituen azalpenak".

Euskal Telebistari eman dion elkarrizketan egin ditu adierazpen horiek Lehendakariak. Agintaldi erdira iritsi denean, egindakoaz eta egiteko dagoenaz hitz egin du Ajuria Enea jauregiko lorategian, eta euskal gizarteak dituen kezka nagusiak eta puri-purian dauden gaiak izan ditu hizpide; hala nola etxebizitza (herritarren kezka nagusia), Osakidetza eta osasun sistema, Espainiako politika, Sanchezen gobernuaren egoera eta ekonomia.

Sanchezen ingurua zipriztintzen duten afera judizialez galdetuta, "errespetua eta zuhurtzia" eskatu ditu Lehendakariak. Sententziarik ez dagoela azpimarratu du, "zantzuak bakarrik", nahiz eta zantzu horietako batzuk "itxura txarra" dutela onartu duen. 

Eskumenen negoziazioari adi

Hain zuzen ere, Gernikako Estatutuak dakartzan eta trasnferitzeke dauden eskumenen negoziazioan datozen asteetan buru belarri arituko dira Eusko Jaurlaritza eta Espainiako Gobernua. Pradalesek aurreratu du Transferentzien Batzorde Mistoa datorren astelehenean, ekainaren 22an, bilduko dela eta Espainiako Gobernuari "arreta negoziazio horietan" jartzeko eskatu dio, "afera judizialetan jarri ordez". Lehendakariaren ustetan, "Espainiako legealdiari begira, garrantzitsua da negoziazioak ondo joatea eta aldebiko batzordea uztailaren amaierarako egitea".

Azken garaian Espainiako Gobernuarekin Jaurlaritzak izan duen tirabira handiena Osasun Sailaren eta Ministerioaren artekoa izan da, medikuen grebaren harira. Zentzu horretan, Imanol Pradales Osasun Ministerioari "laguntzeko prest" agertu da. Haren iritziz, "Monica Garcia ministroa bakarrik geratu da" estatutu marko berria defendatzen. Pradalesen ustez, "estatutu marko hori alde batera utzi eta zerotik hasteko unea da" eta hitz egitera esertzeko deia egin du.  

EAEko biztanleak gehien kezkatzen duen etxebizitzaren gaiari helduta, denbora eskatu du Imanol Pradalesek. Legegintzaldiaren lehen erdian martxan jarri diren neurriek "epe ertainera" emango dituztela emaitzak baieztatu du. "Ezin diegu herritarrei esan hau egun batetik bestera konponduko dugunik", esan du. Horrez gainera, agintaldiaren bigarren erdirako neurri berriak iragarri ditu; hala nola etxebizitzarako gizarte funts bat.

Bestetik, gai horretan EH Bilduk hartu duen norabidea "arraro samarra" dela adierazi du. Koalizioak orain aurkeztu dituen proposamenak eta duela bi urte aurkeztutakoak "ez dira berdinak", lehendakariaren hitzetan, eta Jaurlaritzak proposatutako neurri batzuk eurenak egin dituztela uste du. "Ondo deritzot", gehitu du.

"Itxaropentsu", enplegu publikoaren legearen aurrean

Euskarak epaitegietan jaso dituen kontrako sententzien eta enplegu publikoaren legearen erreformaren gaia aterata, berriz, "negoziazioei aukera" emateko deia egin du, eta itxaropenez begiratzen dio ekainaren 25eko eztabaidari.

Ertzaintzaren kontrako "mugimendu historikoak" 

Ertzaintzak Global Sumud Flotillako kideekin Loiun izan zuen jarreraz galdetuta, bi ideia azpimarratu ditu Pradales lehendakariak. Alde batetik, azaldu du "ertzain izateak ardura eta erantzunkizuna" eskatzen dituela.

Bestetik, uste du Ertzaintzaren aurkako "mugimendu antolatua" egon dela historikoki Euskal Herrian, eta oraindik ere badaudela "kultura horretan bizi edo gizarteratzen diren pertsonak". Hori oso larria dela esatearekin batera, erantzun demokratikoa eman behar zaiola defendatu du.