Agirreren gobernuak amestutako Euskadi eraikitzen jarraitzeko konpromisoa berretsi du Pradalesek
Garai hartako gobernua gogoan, azpimarratu du "askatasuna, demokrazia eta justizia soziala" zituela oinarri, eta bere ekintza politikoa "irakaspen" garrantzitsua izan zela Euskadirentzat: "Euskal gizartea ez da inposaketatik eraikitzen, ezberdinen arteko etengabeko elkarrizketatik baino".
Ospakizun eta aldarrikapen eguna izan dute gaur Gernikako Batzar etxean, Eusko Jaurlaritzaren sorreraren 90. urtemugaren kariaz.
11:00ak jo orduko iritsi dira agintariak Gernikako Arbolara: Bizkaiko Batzar Nagusietako presidente Ana Otadui, ahaldun nagusi Elixabete Etxanobe eta Gernikako alkate Jose Maria Gorroño. Ondoren, Eusko Jauralritzako sailburuak eta Imanol Pradales lehendakaria heldu dira, eta argazkia egin dute bertan.
11:00etarako Gernikan zeuden, baita ere, Juan Jose Ibarretxe, Patxi Lopez eta Iñigo Urkullu lehendakariak. Horiekin batera iritsi dira Jesus Maria Leizaolaren, Carlos Garaikoetxearen eta Jose Antonio Ardanzaren senitartekoak.
Ekitaldi nagusiari 12:00etan eman diote hasiera. Bideo batekin Agirre lehendakariaren garaiko Jaurlaritzaren gakoak azaldu eta Kirmen Uribek beren-beregi ekitaldi horretarako egindako idatziak irakurri dituzte.
Agirrek amestutako Euskadi eraikitzen jarraitzeko konpromisoa
Hitza hartu eta batera, 1936an Jose Antonio Agirreren gobernua batu zuten balio humanista sendoak aldarrikatu ditu lehendakariak, eta ETA babestu zutenei gogorarazi die oraindik ere "zor morala" dutela.
Pradalesek gogora ekarri du, halaber, duela 90 urte sortutako gobernu "pluralak" etsaia —Francoren tropei aipamen eginez— gelditzea zuela helburu, "baina ez edozein modutan, giza eskubideak eta presoen duintasuna errespetatuz baizik".
"Agirreren gobernuaren printzipio humanistek gure iparrorratz morala zuzentzen dute", nabarmendu du.
Garai hartako gobernua gogoan, azpimarratu du "askatasuna, demokrazia eta justizia soziala" zituela oinarri, eta bere ekintza politikoa "irakaspen" garrantzitsua izan zela Euskadirentzat: "Euskal gizartea ez da inposaketatik eraikitzen, ezberdinen arteko etengabeko elkarrizketatik baino".
Hori guztia kontuan hartuta, gogoeta egin du Pradalesek. "Indarkeria hauspotu, babestu edo justifikatu zutenek zor morala dute oraindik ere", esan du.
Guztira, 200 bat gonbidatu gerturatu dira Gernikako Batzar etxera; euskal erakundeetako, alderdi politikoetako, sindikatuetako eta beste elkarte batzuetako ordezkariak. Voxek ez du ekitaldian parte hartu.
Estebanek urtemuga ospatzeko deia egin die euskal herritarrei
EAJko presidente Aitor Estebanek Eusko Jaurlaritzaren lehen gobernuaz esan du "eredu" izan zela eta "arrasto demokratiko ahaztezina" utzi zuela. Horregatik, gaurko eguna ospatzeko deia egin dien euskal herritarrei.
Otegiren iritziz, orduko gobernuaren parean egotea da "omenaldirik onena"
Agirreren gobernuak utzitako legatua aldarrikatu du EH Bilduko idazkari nagusi Arnaldo Otegik, eta ohartarazi du "herri honen alde dena eman zuen belaunaldi hari" egin ahal zaion omenaldirik onena dela autoritarismoaren iritsierak dakartzan erronken mailan egotea, "baldin eta hautestontzietan garaitzen ez bazaio".
Agirreren gobernua "gaurko Euskadiren eredua" da, Anduezaren hitzetan
PSE-EEko idazkari nagusi Eneko Anduezak ziurtatu du Euskadi gaur egun denaren eredu izan zela Agirre lehendakariak zuzendu zuen gobernu "plural eta askotarikoa".