Prezioek beheranzko joerari eutsi diote Espainiako Estatuan

Kontsumorako Prezioen Indizeak (KPI) beheraka egiten jarraitu du urrian, hain zuzen ere % 0,7 egin baitu behera, Espainiako Estatistika Institutuaren (INE) indize aurreratuaren arabera.

Azaroaren 13an datua baieztatuz gero, KPIk hirugarren hilabetez jarraian emango du datu negatiboa, abuztuan % 0,4 eta irailean % 0,9 egin baitzuen behera.

INEk aurreratu duenez, % 0,7ko beherakada izango da urrian, erregaien eta lubrifikatzaileen eraginez bereziki.

Azken hamasei hilabeteetan, bitan bakarrik (2015eko ekainean eta uztailean) garestitu dira prezioak, eta % 0,1 soilik.

Hala eta guztiz ere, Espainiako Gobernuaren aurreikuspenen arabera, KPIk % 0 inguruan itxiko du urtea, edo gorakada arinarekin.