Epaileak BBVA inputatu du, Villarejo Sacyr zelatatzeko kontratatzea egotzita

Manuel Garcia Castellon Auzitegi Nazionaleko epaileak BBVA pertsona juridiko gisa inputatzea erabaki du astelehen honetan, funtzionario-eroskeria, sekretuak agerraraztea eta ustelkeria leporatuta, iturri juridikoek baieztatu dutenez. Ustez Jose Manuel Villarejo komisarioari espioitza operazio bat egiteko enkargua eman zion BBVAk.

Horrela, Ustelkeriaren Aurkako Fiskaltzaren eskaera onartu du Instrukzio Epaitegi Nagusiak. Bankuak Cenyt enpresaren zerbitzuak kontratatu ote zituen ikertzea eskatu du fiskalak. Villarejoren enpresa taldeak pertsona ezberdinak zelatatu omen zituen, Sacyr eraikitzailearen inguruko informazioa lortzeko helburuarekin.

Ikerketa Tandem auziko bederatzigarren pieza da, Villarejok 13 urteetan zehar egindako lanekin lotuta. Lanen truke 10 bat milioi euro jaso zituen poliziak. 2017ko azarotik komisario ohia behin-behineko espetxealdian da.

Ustelkeriaren Aurkako Fiskaltzaren arabera, Francisco Gonzalezek zuzendutako BBVAk Jose Manuel Villarejo komisario erretiratuaren enpresa taldea kontratatu zuen, "legez kanpoko" inteligentzia zerbitzua aurrera eramateko. Pertsonak zelatatu eta komunikazioak edo bankuetako agiriak atzeman zituzten, hainbat pertsonaren oinarrizko eskubideak urratuz.

2017ko azaroan egindako miaketetan atzemandako agiriekin (paper zein euskarri digitalean) BBVAk CENYTi ustez egindako legez kontrako ordainketak frogatu daitezke. Zuzendaritzako kideek eta bankuko arlo garrantzitsuek egin omen zituzten.

Era berean, ikertutako zuzendariren batek Cenyten opariak jaso zituen kontratazioak erraztearen truke. Auzia sumario-sekretupean dagoenez ez dute izenen berririk eman.

Guzti horregatik, Zigor Kodeko 31 bis artikuluarekin ados, pertsona fisikoek egindako delituen erantzukizuna pertsona juridikoari egotzi diezaiokete. Ondorioz, bankua kaltetu bezala agertzea baztertu du Garcia Castellon epaileak. Horrela, BBVA akusazio partikularra izatea errefusatu du.

Tandem auziko bederatzigarren pieza oso konplexua da, eta ikertzaileen lanak aurrera egin ahala handiagoa bihurtu da.

Piezan zenbait inputatu dira dagoeneko, besteak beste, Julio Corrochano BBVAko segurtasun buruzagi ohia (Poliziako komisario ohia). Hala ere, epaileak aske utzi zuen 300.000 euroko fidantzapean, uztailaren 5ean, nahiz eta deklaratzeari uko egin.

Era berean, beste zortzi pertsona ikertzen ari dira, funtzionario-eroskeria eta sekretuak agerraraztea leporatuta; guztiak Francisco Gonzalezen presidentetzan emandako enkarguengatik.