270 eta 900 euro bitarteko oinarrizko errenta eskatu dute EAEko herritar guztientzat

Pobreziaren eta gizarte-bazterketaren aurkako borrokan lanean ari den plataforma batek herri ekinaldi legegilea aurkeztu du Eusko Legebiltzarrean, EAEn 270 eta 900 euro bitarteko baldintzarik gabeko oinarrizko errenta eskatzeko.

Ekinaldia aurkeztu duten herritarrek baldintzarik gabeko diru-sarrera indibiduala eta unibertsala aldarrikatu dute. Asmoa da aurrekontu orokorrekin finantzatzea eta eskubide subjektiboa izatea, alegia, osasuna eta hezkuntza bezala, aurrekontuei eragin diezaiekeen edozein egoeraren aurrean lehentasuna izatea.

Hartara, emantzipatuta dauden 18 urtetik gorako pertsonentzat 900 euroko errenta eskatu dute; 450 eurokoa emantzipatuta ez dauden 14 eta 18 urte bitartekoentzat eta 270 eurokoa 14 urtez azpikoentzat.

Esan bezala, EAEko herritar guztiek izango lukete errenta hori jasotzeko aukera, lana izan ala ez. Halaber, ez litzateke kontuan izango norekin bizi den errenta eskatu duen pertsona hori, ezta beste errenta iturri batzuk dituen ere.

Horrekin batera, ekinaldi legegilearen bidez galdegin dute diru-sarrera hori kontsumo-prezioen indizearen hazkundera egokitzea, baldin eta zerotik gorakoa bada.

Plataformaren esanetan, errenta horrek ez luke gainerako eskubide subjektiboetan eraginik izango.

Behin ekinbidea Legebiltzarrean erregistratuta, tramitera onartzen duten ala ez erabaki beharko dute orain, eta baiezko kasuan, 10.000 sinadura bildu beharko lituzke, legebiltzarkideen artean eztabaidagai izan dadin.

Plataformako ordezkariek argi utzi dute "prozesu luzea" duela aurretik, eta nabarmendu dute herritarren babesa beharrezkoa dela errenta hori lortu ahal izateko.