Euskal pentsiodunen arabera, erreforma berriak "ez die erantzuten premiazkoenak diren eskaerei"

Euskal Herriko Pentsiodunen Mugimenduak deitoratu du pentsioaren eta lanaren arteko bateragarritasuna hobetzeko Errege Lege Dekretuak ez diela erantzuten kolektiboan "premiazkoenak diren eskaerei". Era berean, "pentsio publiko duinak eta nahikoak bermatzen dituzten erabaki esanguratsuen ordez, erabaki partzialak" hartu direla salatu du, "soldata baxuen eta pentsioen arazoa ezkutatzeko".

Ministroen Kontseiluak Errege Dekretua onartu du gaur, 2025erako pentsioen eta Gizarte Segurantzaren beste prestazio batzuen araudia garatzeko eta horien balioa areatzeko, Gizarte Segurantza Ministerioak gaur jakitera eman duenez.

Urtarrilaren 1etik, oro har, % 2,8 igo dira Gizarte Segurantzako sistemako eta Estatuko Klase Pasiboetako pentsioak; % 9 igo dira kotizazio gabeko pentsioak eta Bizitzeko Gutxieneko Diru-sarrerak, eta % 6 inguru igo dira gutxieneko pentsioak.

Pentsiodunek "duela zazpi urte baino gehiagotik" dituzten aldarrikapenak berretsi dituzte, Espainiako Gobernuak, CEOE eta CEPYME patronalek eta CCOO eta UGT sindikatuek uztailean sinatutako akordioak jasotzen duen pentsioaren eta lanaren arteko bateragarritasuna hobetzeko Errege Lege Dekretua asteazkenean Kongresuan bozkatu behar dutela eta.

Hala, Errege Lege Dekretuak pentsiodunek Kongresuan ordezkaritza duten alderdi politikoei eta Estatuko Gobernuari "behin baino gehiagotan" azaldu dizkieten "premiazko eskaerei erantzuten ez" diela kritikatu du mugimenduak.

"Gure eskaerak oraindik ez dira aintzat hartu", nabarmendu du kolektiboak, eta pentsioek "2011tik galdutako erosteko ahalmena berreskuratu gabe" jarraitzen dutela deitoratu du.

Era berean, ohartarazi dutenez, "gutxieneko pentsioen hobekuntza errotik moztu da 2023ko erreforman, gutxieneko pentsio kontributiboetarako pobreziaren atalasea % 100ean eta kotizazio gabekoetarako % 75ean jarri baita".

Pentsiodunen Mugimenduak salatu duenez, 2011ko erreforman ezarritako "murrizketek" indarrean jarraitzen dute, hala nola erretiro-adina pixkanaka 67 urtera arte igotzea edo "pentsioa kalkulatzeko eta % 100 jasotzeko behar diren urteak areagotzea", besteak beste, "pentsioak murrizten ari baitira".

Halaber, genero-arrakalarekin amaitzeko "erabaki eraginkorrik hartu gabe" jarraitzen dutela azpimarratu du kolektiboak; izan ere, ohartarazi duenez, arrakala hori % 37koa da.

"40 urte edo gehiago kotizatuta izanik, erretiro aurreratuaren koefiziente murriztaileek pentsioan kalte egin diete milaka pentsiodunei, eta ez diete erantzunik eman beren eskakizunei", gaitzetsi dute.