Bridgestoneko CCOOk, UGTk eta BuBk sinatu egin dute Basaurin 232 kaleratze ekarriko dituen erregulazioa

Bridgestone Hispania Manufacturing enpresak akordioa lortu du langileen legezko ordezkariekin (CC.OO., UGT eta BuB), Basauriko (Bizkaia) eta Puente San Migueleko (Kantabria) lantegietan hasitako kaleratze kolektiboaren prozeduraren barruan. Guztira 420 pertsonari eragingo die, enpresak ohar batean jakinarazi duenez.

Astelehen honetan egin dute kontsulta azken bileran eta CC.OO, UGT eta BuB sindikatuek sinatu dute akordioa, ELA eta SITBren ezezkoarekin.

Bridgestonek nabarmendu duenez, akordioak sindikatuen gehiengoaren eta konpainiaren zuzendaritzaren babesa du, eta aurreikusten du hasieran aurreikusitako kaleratze kopurua murriztea, baldintza ekonomikoak "hobetzea" eta "bi lantegien etorkizuna indartzera bideratutako" konpromiso industrialak.

Bridgestone multinazionalaren Basauriko eta Puente San Migueleko langileek erreferendum bidez onartu zuten EEErako enpresaren azken proposamena, aldeko 805 boto (% 69,4), kontrako 322 (% 27,8), 29 boto zuri eta 3 baliogabe emanda. Bizkaiko lantokiko 232 langileri eta Kantabriako 188ri eragingo die erregulazio-espedienteak. 

CCOOk, UGTk eta BuBk erreferendumean ateratakoa errespetatuko zutela hitz eman zuten. Behin langileek onartzearen alde eginda, beraz, akordioa onartuko dute. Hortik aurrera, enpresak Administrazioari igorriko dio dokumentazioa, eta hark 15 egunen buruan ebatzi beharko du prozesuak legezko parametroak betetzen dituen, Roberto Corral Basauriko langileen batzordearen presidenteak azaldu duenez. 

Bien bitartean, aurre-erretiroak edo borondatezko bajak eskatu nahi dituzten langileei enpresari horren berri emateko epea zabalduko du lantegiak. Horrela, ekainaren 23tik aurrera aplikatuko litzateke enplegu-erregulazioko espedientea. 

Sindikatuek esku artean dituzten datuen arabera, 100 langile inguru dira Basauriko lantegian aurre-jubilazioa eskatzeko adinean, eta 40 bat Puente San Miguelen. Gainera, askok dute borondatezko baja hartzeko interesa. Lan egindako urte bakoitzeko 45 eguneko kalte-ordaina jasotzeaz gain (hileko mugarik gabe), 30.000 euro jasoko dituzte. 

Horrela, sindikatuen iritziz, nabarmen jaitsiko da kaleratze traumatikoen kopurua. Aurre-jubilazioak kenduta, 280 langile kaleratuko dituzte, eta pizgarridun bajak hartuko dituzte batzuek, indemnizazioa jaso nahi dutelako edo beste enpresa batean lana berehala lortzeko aukera ikusten dutelako. 

Baja hartzeko bete beharreko baldintzak gorabehera, enplegu-erregulazioko espedienteak eragingo dien arloetako langileek pizgarridun bajak hartzeko eta aparteko 30.000 euroak jasotzeko aukera izango dute (enplegu-erregulazioko espedientea aplikatuta kaleratuko balituzte, ez lukete jasoko). "Enpresak azken finean hauxe esan du: lanpostu batzuk txostenean sartuko ditut, eta beste batzuk, ez. Orduan, lanpostua txostenean sartuta dutenek aukeran dute borondatezko baja eskatu, nahiago dutelako 30.000 euro gehiago poltsikoratu", azaldu du Basauriko batzordearen presidenteak.

Gaineratu duenez, borondatezko bajen kasuan "aniztasuna" egongo da, horretarako arrazoiei dagokienez: "Batzuek benetan hala nahi dutelako hartuko dute, familiako ekonomia konpontzeko aukera hori probestu eta lanera beste norabait joango direlako, eta beste batzuek, kaleratuak izateko arriskuan egongo direlako, eta, horri aurre hartuta, nahiago izango dutelako 30.000 euro horiek jaso". 

Behin grebak bertan behera utzita, akordioa sinatu ondoren, ekoizpena egokituko da, eta ekainaren 23tik aurrera dauden bajen arabera moldatu beharko da, gelditzen diren langileak postuetan berrantolatu eta arlo batetik beste batera aldatzen diren langileei formakuntza emateaz gain. 

Mikel Torres bigarren lehendakariorde eta Ekonomia, Lan eta Enplegu sailburuak modu positiboan baloratu du Bridgestoneko langileen erabakia errespetatzeko eskatu du, eta erantsi du Eusko Jaurlaritzak langileak babestuko dituela.