Euskadiko Medikuen Sindikatuak lau eguneko greba hasi du, Estatutu propio baten aldarrian

Espainiar Estatu osoko medikuak grebara deituak daude gaurtik, tartean Espainiako Ministerioak aurkeztu duen Estatutu Markoaren lege-aurreproiektuaren kontra eta Estatutu propio baten alde. Euskadin, grebarekin bat egin du Euskadiko Medikuen Sindikatuak.

Horrenbestez, abenduaren 12ra arte, ostirala, ospitaleek eta anbulatorioek gutxieneko zerbitzuetan egingo dute lan, eta larrialdiak eta halabeharrez artatu behar diren patologiak dituzten pazienteei soilik emango diete laguntza.

Medikuek kontzentrazioak egingo dituzte aste osoan. Gaur, asteartea, elkarretaratzea egin dute Gurutzetan, 11:00etan, eta eguerdian manifestazioa deitu dute Bilbon, Moyua plazatik Osasun Saileraino.

Asteazkenean, elkarretaratzea egingo da Gurutzetan (10:00etan) eta Donostiako Unibertsitate Ospitalean (12:00etan). Ostegunean, Gurutzetan (10:00etan) eta Txagorritxu AUOn (12:00etan); eta ostiralean, kontzentrazioak 11:00etan Gurutzetan eta 12:00etan Basurtuko Osasun Zentroan izango dira.

MUDen babesa

Sektoreko profesionalen artean aintzatespen eta babes oso zabala duen Medicos Unidos por Nuestros Derechos (MUD) irabazi-asmorik gabeko mugimendu asindikalak ere babestu du greba. 

Manifestu batean, mugimendu horrek argitu du greba egiten badute, hori dela "pazienteak baldintza egokietan artatu ahal izateko", izan ere, salatzen dute, adibidez, astean 90 ordura arteko lanaldiak dituztela, erretirorako kontuan hartzen ez diren lanorduak dituztela, edo soldata desegokiak dituztela, besteak beste, aparteko ordua ordu arrunta baino gutxiago kobratzen delako.

Ziurtatu dute politikek medikuen bizkar jarri dutela osasun-arretaren zama, eta ikuspegi laburreko politiken ondoriz, sistema ahuldu egin dela. 

Mugimenduak Osasun Ministerioaren aurreproiektua kritikatu du, "aurkeztutako testuak gehiago balio baitzuen gure herrialdeko sindikatu nagusien nahiak asetzeko, osasun sistema nazionalari eta pazienteei eragiten dieten arazoak konpontzeko baino".

"Testu horrek, Espainiako medikuon lan-eskubideen murrizketa bidegabeetako bat ere ez aldatzeaz gain, gure lana negoziazio sindikalaren eremuan nagusi diren beste kategoria batzuetakoekin parekatu nahi zuen", gaineratu dute.

Gauzak horrela, "legedi modernoa" aldarrikatu dute, "gure pazienteek mediku espezialistak izan ditzaten, prestatuak, beharrezko atsedena hartutakoak eta artatzeko denborarekin, zainketarik onena jaso ahal izan dezaten".

Elkargoen aldarriak

Greba honekin bat egin dute Arabako, Bizkaiko eta Gipuzkoako Medikuen Elkargoek, zeintzuk aspalditik ari diren medikuen lan-baldintza kaskarrak salatzen. 

Arabako Sendagileen Elkargoak nabarmendu du medikuen "betebeharretako bat" dela manifestatzea, "denboran zehar luzatzen ari den bidegabekeria egoera" salatzeko.

Elkargoak ziurtatu du estatutu propio batek islatuko dituela lanbidearen berezko ezaugarriak, eta erregulazio espezifiko baten beharra defendatu du.

Izan ere, Arabako erakundeak profesionalen egoera prekarioa eta bidegabea salatu du, agintariek "bokazioaren premisaren azpian ezkutatzen" dutena.

"Ez gabiltza hau aldarrikatzen gogoak eman digulako, ez da deialdi korporatibista. Justizia sozialaz ari gara", azpimarratu du Arabako Sendagileen Elkargoak.

Gipuzkoako Sendagileen Elkargoak kaleratutako ohar batean adierazi duenez, "mobilizazio horiek egoera jasanezin bati erantzuten diote: Herritar guztiek jasotzen duten osasun-arretaren kalitatean zuzenean eragiten duten lan-baldintza duinen aldeko borroka dira". 

Gaineratu dutenez, "medikuen egoera kritikoa da eta osasun publikoak bizi duen egoeraren isla baino ez da: lan-gainkarga, langile-falta, agenda eginezinak eta profesionalen osasuna eta pazienteen segurtasuna arriskuan jartzen dituen prekarizazio kezkagarria", eta babesa erakutsi dio erakundeak greba egitea erabakitzen duen mediku orori. 

Bizkaiko Sendagileen Elkargoak nabarmendu duenez, "ezinbestekoa da zenbait alderdi berariaz arautuko dituen esparru bat sortzea, hala nola karrera profesionala, autonomia klinikoa, babes juridikoa, guardien antolaketa eta atsedenaldiak, etengabeko prestakuntzaren beharrak barne".

Horrez gain, Estatutu propio baten alde ari dira, diotenez, "gure jarduera antolatzeaz gain, asistentziaren kalitatea indartuko duen eta osasun-sistemak hura sostengatzen duten profesionalak erakartzeko, bertan geratzeko eta motibatzeko aukera emango duten baldintzak izango dituela bermatuko duen arau-tresna bat eskatzea".

Ministerioak ez du testua erretiratzeko asmorik

Javier Padilla Estatuko Osasun idazkariak TVEn egindako elkarrizketa batean adierazi duenez, testua erretiratzeak "osasun sistemaren beraren antolamendu juridikoa haustea" ekarriko luke.

"Kontua ez da erretiratzea, baizik eta ulertaraztea medikuak erregulaziotik aparte ateratzeak hautsi egiten duela pazientearen arreta bere osotasunean kudeatu behar duen Osasun Sistema baten ideia", esan du. Hala ere ziurtatu du Ministerioak ez duela jarrera hertsia eta aurrera egiten jarraitu nahi duela.

Padillak azpimarratu du "galtzeko askoz gehiago" dagoela zerotik hasi eta "testua tiradera batean sartuz gero".

Bere ustez, estatutuak barne hartzen ditu Osasun Ministerioaren eskumenekin zerikusia duten aldarrikapen guztiak, hala nola atsedenaldiak bermatzea edo guardiei buruzkoak, baina zehaztu du badagoela autonomia erkidegoen eskumenekin lotuta dagoen zati garrantzitsu bat, hala nola ordainsariena, eta Esparru Estatutuan ezin direla horiek jaso, eskumenak inbaditzea litzatekeelako eta horrek "araua osorik atzera bota dezakeelako". 

Espainian, negozioazio orokorra

Espainian orokorragoa ari da izaten negoziazioa, izan ere sindikatu nagusiek (SATSE-FSES, CCOO, UGT, CSIF eta CIG-Saude) Espainiako Osasun Sistemako langile guztien lan baldintzak hobetzea eskatu dute, sanitarioak eta ez sanitarioak. Hala ere, elkarteek kritikatu dute Osasun Ministerioa ez dela argia izaten ari langileei eragiten dieten gai askotan; besteak beste, erretiro aurreratuan, birsailkapen pertsonalean eta 35 orduko lanaldian.

Arrazoi horiek tarteko, urtarrilaren 27tik aurrera greba mugagabea egingo dute Estatu osoan.

Sindikatu orokor horietan ordezkaritza txikia dute medikuek, euren sindikatu propioetan antolatu direlako, eta, beraz, ikusteko dago medikuek urtarrilaren 27tik aurrerako greba hori babestuko duten. Baina, gaur-gaurkoz agerikoa dena da sindikatu orokor horiek ez dutela babestu gaurtik sendagileek deitu dituzten grebak.