Ayesaren erosketa ixteko azken orduak

Gaur amaituko da Ayesa erosteko akordioa ixteko eman zuten epea. Kutxabankek, BBK Fundazioak eta Eusko Jaurlaritzak osatzen duten partzuergoa azken xehetasunak ematen ari da eta baikor dira, operazioa egingo dela uste dute.

Mikel Jauregi Industria, Trantsizio Energetiko eta Jasangarritasun sailburuak ziurtatu du "negoziaziorako funtsezko orduak" direla, eta akordioa gaur ixtea espero duela, ezarritako epea amaitu baino lehen.

Jauregik azaldu duenez, eragiketak hiru fase ditu: eskaintza esleitzea, erosketa-akordioa sinatzea eta, ondoren, notario aurreko itxiera formala, akzio-aldaketen ziurtagiriarekin. Azken fase hori hiru eta lau hilabete artean luza daiteke, eta epe horretan akzioen banaketa alda daiteke.

Testuinguru horretan, sailburuak baieztatu du Vital Fundazioa proiektuan ondorengo fasean sartzea aztertzen ari dela, akzio-egitura birdefinitzen denean. Beraz, ez litzateke sartuko sinaduraren hasierako unean.

Jauregik azpimarratu du Ayesa erostea aukera estrategikoa dela Euskadirentzat, bai enpresak lurraldean dituen 2.000 lanpostu inguru bermatzeko, baita etorkizuneko proiekzioa duen konpainia baten erabakigunea berreskuratzeko ere.

Sailburuak nabarmendu duenez, Ayesak erosi zuenean Ibermatica Euskaditik atera zela, eta operazio honi esker, Gipuzkoako enpresa historikoa itzultzeaz gain, enpresa talde handiago bat ere sartuko litzateke.