GATAZKA OSASUN ARLOAN

Gorde
Kendu nire zerrendatik

Medikuen grebari amaiera emateko "giltza" erkidegoek dutela egin du Garciak

Osasun ministroak gogorarazi du 2000. urtetik erkidegoen esku daudela Osasun Sistemaren baitako hainbat eskumen, horien artean, kudeaketarekin, langileen planifikazioarekin, giza baliabideekin eta lan-baldintzen hobekuntzekin lotutakoak.

monica garcia

Monica Garcia, gaur, Ministroen Kontseiluaren osteko agerraldian. Argazkia: EFE

Medikuen grebari amaiera emateko "giltza" autonomia erkidegoetako gobernuen eskuetan dago, eta horiek gaur arratsaldean dute "zein urrats egiteko prest" dauden "erakusteko aukera", erkidegoetako Osasun ordezkariek egingo duten bileran. 

Monica Garcia Espainiako Gobernuko Osasun ministroak esan ditu hitzok, erkidegoetako osasun arduradunekin bihar, asteazkena, egingo duen batzarraren atarian. "Une honetan, erkidegoek dute lanuzteei amaiera emateko giltza. Osasun Ministerioan ahal beste egin dugu, legeak ahalbidetzen digun guztia. Ez ditugu legea eta eskumenak urratuko", esan du Ministroen Kontseiluaren ondoren egindako agerraldian. 

Hainbatetan egin bezala, osasungintzako profesionalen Estatutu Markoa erreformatzeko Osasun Ministerioak egindako lana nabarmendu du. Ministroen Kontseiluak ekainaren 2an onartu zuen lege-proiektua, eta, orain, tramitazio bidean dago. Indarrean sartzeko, Kongresuan egin beharko du aurrera. 

Osasun ministroak gogorarazi du 2000. urtetik erkidegoen esku daudela Osasun Sistemaren baitako hainbat eskumen, horien artean, kudeaketarekin, langileen planifikazioarekin, giza baliabideekin eta lan-baldintzen hobekuntzekin lotutakoak.

Zer proposatu du Osasun Ministerioak?

Medikuen aldarrikapenen aurrean "errespetu osoa" agertu ondoren, Garciak erantsi du "erkidegoen txanda" dela eta gaurko bileran mahai gainean jarriko direla Ministerioaren esku ez dauden eskari guztiak. 

Zehaztu du, besteak beste, guardia orduak murriztea, ordu horien ordainsariak, medikuentzako negoziazio-mahai propioak eta 35 orduko lan astea izango dituztela aztergai batzarrean. "Erkidegoen eskumenak, den-denak", ministroaren hitzetan. 

Garciak, EAJri: "Eskumenak deszentralizatu eta errua zentralizatu, hori ezin da egin"

Senatuan arratsaldean egin den saioan, Nerea Ahedo EAJren senatariak Garciari leporatu dio medikuen kolektiboaren "eskariak entzun gabe" Estatutu Markoa onartzea. Espainiako Gobernuak eragin duen gatazka bat erkidegoak ari direla "jasaten" esan du ordezkari jeltzaleak. 

"Ez duzue ulertzen edo ez duzue ulertu nahi zuen eskumenak zein diren; Euskadik bereak zeintzuk diren ondo daki", esan dio ministroari. "Etxeko lanak egin" eta medikuen sindikatuekin negoziatzera esertzeko eskatu dio.

Zorrotz erantzun dio Garciak, eskumenek berekin ardurak dakartzatela gogora ekarriz. "Ezin dena da eskumenak deszentralizatu eta errua zentralizatu", adierazi du. 

Beste behin esan du Osasun Ministerioak "bete egin" duela bere lana, eta orain erkidegoei dagokiela medikuen eskariei erantzutea, azken horiena delako ordainsarien eta lan-baldintzen inguruko erabakiak hartzeko ardura. 

Zure interesekoa izan daiteke

Gehiago ikusi
Publizitatea
X