Bizkaiak “etorkizuna eraikitzeko lekua” dela aldarrikatu du Madrilen, inbertitzaileak erakartzeko

Bizkaiko ahaldun nagusi Elixabete Etxanobek lurraldearen zerga abantailak eta enpresa proiektu berriak garatzeko eskaintzen dituen aukerak aurkeztu dizkie Espainiako enpresa handietako ordezkariei.

Bizkaiko Foru Aldundiak antolatuta, Bizkaia Invierte jardunaldia egin dute Madrilen, eta ehundik gora enpresa, erakunde eta instituziotako ordezkari bildu dira bertan. Helburua izan da Bizkaiaren indargune industrialak, fiskalak eta berrikuntzari lotutakoak ezagutaraztea, baita balio erantsi handiko proiektu berriak garatzeko eskaintzen dituen aukerak ere.

Besteak beste, ekitaldian izan dira CEOEko presidente Antonio Garamendi, Iberdrola Espainiako kontseilari ordezkari Mario Ruiz-Tagle, Telefónica Españako presidente Borja Ochoa, BBVA Españako herrialde arduradun Peio Belausteguigoitia eta Petronorreko presidente Emiliano López Atxurra.

"Industria tradizio sendoa"

Jardunaldiaren hasieran, Etxanobek adierazi du Bizkaia "ez dela soilik inbertitzeko toki egokia, etorkizuna eraikitzeko lekua ere bada". Haren esanetan, lurraldeak industria tradizio sendoa uztartzen du berrikuntzaren, talentuaren eta lankidetza publiko-pribatuaren aldeko apustu irmoarekin.

Halaber, nabarmendu du Bizkaiko erakundeek "egonkortasuna, segurtasun juridikoa eta enpresen hazkunde aukerak gizartearen beharrekiko lerrokatzen dituen zerga esparrua" eskaintzen dituztela.

Etxanoberen arabera, Bizkaiaren zerga eredua ez dago zergen jaitsiera orokorretan oinarrituta; aitzitik, lehiakortasunean eta ongizate kolektiboan eragin positiboa duten jokabideak sustatzea du helburu.

Bestalde, Ogasun eta Finantzetako foru diputatu Itxaso Berrojalbizek azpimarratu du Ekonomia Itunak aukera ematen duela enpresa sarearen beharretara egokitutako zerga politikak diseinatzeko, inbertsioa, berrikuntza eta kalitatezko enplegua sustatzeko.

Industria eta zerbitzu aurreratuak dira Bizkaiko ekonomiaren motor nagusia. Izan ere, balio erantsi gordinaren % 38 eta enpleguaren % 30 ordezkatzen dituzte. Lurraldean 4.128 industria establezimendu daude, eta sektorearen negozio bolumena 31.492 milioi eurokoa da.

Gainera, Bizkaiak Euskadiko zerbitzu aurreratuen % 56,8 biltzen ditu, eta espezializazio handia du balio erantsi handiko arloetan: fabrikazio aurreratua, energia, mugikortasuna, aeronautika eta teknologia berriak, besteak beste. Horrek ekosistema erakargarria osatzen du enpresa proiektu berriak eta inbertsio estrategikoak garatzeko.