Pirinioetako abeltzainek hartzak zaintzeko eskatu dute, horien kopurua abeltzaintza estentsiboarekin "bateragarria" izan dadin

Nafarroako Pirinioetako abeltzainak kezkatuta agertu dira asteburu honetan Otsagabia eta Ezkaroze artean hartza agertu delako eta Aribe herrian beste bat ikusi dutelako. Animalia hori babesteko politikak "berrikusteko" eskatu dute, eta haren populazioa "abeltzaintza estentsiboarekin bateragarria den kopuru batera mugatzea" proposatu dute, baita "hartzik gabeko eremuak" ezartzea ere, abeltzaintzan bertan aritu ahal izateko.

Orbaizetako, Erroibarko eta Uretako abeltzain eta artzainek prentsaurrekoa eman dute Iruñeko EHNE sindikatuaren egoitzan. Felipe Etxetxikia sindikatuaren idazkari nagusiaren esanetan, Pirinioetan 120 hartz inguru daude eta hori "kopuru handia" da. Hori dela eta, "hartz-populazio onargarria zein den" hausnartzeko deia egin du, mendiko abeltzaintza estentsiboaren eta hartz-populazioaren arteko "oreka lortzeko".

Abeltzainen esanetan, azken urteak "nahiko lasaiak" izan diren arren, hartz-populazioa "pixkanaka hazten ari da, eta horrek esan nahi du lur eremu zabalagoa beharko dutela bizitzeko". Beraz, uste dute herrietatik eta baserrietatik "gero eta hurbilago dauden eremuetan finkatuko" dela.

Profesional horien esanetan, hartzaren presentzia "ez da bateragarria animaliak modu estentsiboan ibiltzearekin". Azaldu dutenez, hartz baten erasoaren ondorioz, animaliak hiltzea lortu ez arren, "ardiek esnea ekoizteari uzten diote, erditu berri diren behiei ere eragiten die..."

Azken 20 urteetan Nafarroan ardien kopurua "ia erdira" murriztu dela azpimarratu dute, eta sektorearen egoera "hartzaren presentziaren ondorio ez" dela onartu arren, eremu jakin batzuetan egoerak "gainezka egitea eragin" dezakeela ohartarazi dute.

Abeltzaintzaren onurez ere mintzatu dira. Alde batetik, Pirinioetan herriak ez hustea ekartzen duela azaldu dute. Bestetik, defendatzen dute ganaduaren presentzia "funtsezkoa" dela "ekosistemari eusteko, suteak prebenitzeko eta paisaiak orekatzeko".

Horregatik guztiagatik, hartza babesteko politikak "berrikusteko"eskatu dute, hala nola Europar Batasunaren Habitatei buruzko Zuzentaraua eta eremu bakoitzeko leheneratze-plan espezifikoak. Halaber, "hartz-populazioa abeltzaintza estentsiboarekin bateragarria den kopuru batera mugatzea eta hartzik gabeko eremu zehatzak ezartzea planteatu" behar dela adierazi dute.