Euskal Herriko hiriburuak, sexu-erasorik gabeko jaien alde

Euskal Herriko zenbait udalerritan, hiriburuetako batzuetan ere, hainbat kanpaina ari dira bultzatzen 2015eko udako jaietan sexu-erasorik ez egoteko asmoarekin. Iruñeko San Fermin jaietan (uztailaren 14an amaitu ziren), Baionako jaietan (uztailaren 29tik abuztuaren 2ra), Gasteizeko Andre Maria Zuriaren jaietan (abuztuaren 4tik 9ra), Donostiako Aste Nagusian (abuztuaren 8tik 15era) eta Bilboko Aste Nagusian (abuztuaren 22tik 30era) ekimen batzuk jarri edo jarriko dituzte jomuga zehatz batekin: jaiegunetan inolako eraso matxistarik ez egotea.

Familia eta Berdintasunerako Nafarroako Institutuaren proposamenari jarraituta, Iruñean esku gorri bat erabili dute, sanferminetan inolako eraso matxistarik onartuko ez zutela nabarmentzeko. Udalak eskatu die herritarrei ez baimentzeko horrelako erasorik, autodefentsa-neurriak praktikan jartzeko eta 112 zenbakiaren bat egiteko, zalantzarik izanez gero.

Txapak eta txanoak, Gasteizen

Baionan zenbait aldiz jaso dituzte sexu-erasoak jaietan zehar azken urteetan; hori dela eta, 2015ean ahalegin berezia egingo dute, hori saiheste aldera. Gasteizen helburu hori bera dute; izan ere, txapak banatuko dituzte, erasoen aurkako aldarrikapena egiteko, eta txanoak ere hedatuko dituzte hiritik. "Nekagarria edo gogaikarria izatea ez da ligatzea, erasotzea baizik", nabarmentzen dute Udalaren webgunean, non topatu ahal den, halaber, zer pertsonaia ez duten onartzen jaietan: ?Lorolapa? eta ?Oilarsaurioa?. "Hartzak abegiz", aldiz, "onartzen dugun espezie bakarra" da, bertan diotenez.

Donostian eta Bilbon hainbat ekimen abiarazi zituzten 2014an euren jaietan sexu-erasorik egon ez zitezen. Hain zuzen, Bilboko Udalak kanpaina bat bultzatu du azken hilabeteetan hiriko auzoetan ospatutako jaietan. Donostian arduraz jokatzeko deia egin zuen Udalak, elkarri laguntza ematekoa, eta Bilbon estutzea erasotzea dela azpimarratu zuten orain dela urtebete. 2015ean euren konpromisoa berrituko dute, indarkeria horren aurka.