Ondarroako arrantzontzi bat zigortu dute babestutako marrazoak arrantzatzeagatik

Gernikako epaile batek Ondarroako arrantzontzi baten jabea eta patroia zigortu ditu ingurugiroaren kontrako delitu batengatik, desagertzeko arriskuan dagoen 20 marrazo muturmotz arrantzatzeagatik.

Eguzki elkarte ekologistak jakinarazi duenez, 3 hilabete eta 10 eguneko isuna ezarri diete biei, egun bakoitzeko 6 euro, eta ezin izango dute tarte horretan arrantza egin.

Eguzki izan da salaketa sustatu duena, eta uste du ebazpena "garrantzitsua" dela, zigorra "merkea" iruditu zaion arren.

Talde ekologistak azaldu duenez, 2018ko apirilaren 23an, Arrantza Ikuskaritzak 20 marrazo muturmotz atzeman zituen itsasontzian, Ondarroara bidean. Gainera, espedientea ireki zioten arrantzontziari arrantzatutakoa baino gutxiago deklaratzeagatik.