GuraSOSek Asensioren dimisioa eskatu du, Arkaitzerrekako ubideko isuriaren ostean

GuraSOS elkarteak Jose Ignacio Asensio Ingurumen eta Obra Hidraulikoen ahaldun eta Gipuzkoako Hondakinen Kontsortzioko (GHK) presidentearen dimisioa eskatu du; izan ere, elkarteak salatu duenez, "Zubietako erraustegiko arduradunek, hasiera batean, Arkaitzerreka ubidean aipatutako azpiegituraren enpresa emakidadunak egindako isuriaren hondamendia ikertzekoak ziren URA Uraren Euskal Agentziako ikuskatzaileak sartzea saihestu nahi izan zuten".

Ohar batean, GuraSOSek ziurtatu du "Zubietako erraustegiko arduradunek, hasiera batean, URAko ikuskatzailea fabrikan sartzea" saihestu zutela. Aurreko larunbatean gertatu zen, eta ikuskatzailearen lana zen Arkaitzerrekako ubideko arrainen heriotzaren arrazoiak bero-beroan ikertzea.

"Gerorako egindako gestio batzuei esker, ikuskatzaileak, azkenean, aukera izan zuen eraikinaren barnealdera sartzeko", esan du GuraSOSek. "112 larrialdi-zerbitzuetara egindako dei batengatik abiatu zuten ikuskapena"; hain zuzen ere, "bertako bizilagun batek jakinarazi zuen ubidean hildako dozenaka arrain zeudela".

Ikuskapenerako atzerapena eta oztopoa

Elkarteak gaitzetsi duenez, URAko ikuskatzaileei erraustegira sartzeko baimenik ez emateak ekarri zuen "bero-beroan egitekoa zen ikuskapenerako atzerapena eta oztopoa; halaber, horrek "ikuskatzaileen lana legez kanpoko modu batean oztopatu egin zuen".

Ildo horretan, elkarteak zehaztu duenez, Kutsaduraren Prebentzioaren eta Kontrol Integratuaren Legeak tipifikatuta du "ikuskapenaren eta kontrolaren jarduera atzeratzea edo oztopatzea arau-hauste larria” dela; kasu horietarako, 20 000- 200 000 euro arteko zigor ekonomikoa du ezarrita, bai eta lantegia bi urtera arteko eperako ixtea ere".

Halaber, gehitu duenez, "Gipuzkoako Hondakinen Kontsortzioak hasierako jarrera zuzendu behar izan du; hain zuzen ere, hasieran istripu larri hau ezkutatu eta ezeztatu egin zuen. Isuriaren gainean gezurra esan zuen, adierazi baitzuen gertatu ez zela, eta bere erantzukizuna uko egin zuen, oso zorrotz".

Hori dela eta, GuraSOSek Markel Olano ahaldun nagusiak premiazko agerraldia egitea eskatu du, bai eta Jose Ignacio Asensio GHK-ko presidentearen dimisioa ere.