Ez, PCR probek ezin dute edozein birusekin positibo eman

Koronabirusa atzemateko erabiltzen diren PCR probak guztiz fidagarriak dira pertsona batek gaitza duela baieztatzeko, SARS-CoV-2 birusaren informazio genetiko espezifikoarekin egiten direlako. Hala adierazi dute osasun arloko adituek, azken egunetan sare sozialetan bolo-bolo zabaldu diren mezuen aurrean. Mezu horietan, proba horiek ez dutela "koronabirusa isolatzeko" balio ziurtatzen da.

"PCR probek RNAren zatiak baino ez dituzte atzematen, birus gehienentzat berdinak dira (...) eta gaixotasunik ez duten pertsonengan ere egon badaude", dio Twitter bidez zabaldutako mezuak. Facebooken, berriz, test horiek ez direla fidagarriak "zientifikoki frogatuta" dagoela ziurtatzen duen kartel bat partekatu dute erabiltzaile askok azken orduetan. Gainera, PCR proba "baliogabetzat" jotzeko eskatzen du, epaitegietara jotzeko aukera zabalik utziz.

"PCR testek ez dute balio COVID-19 birusa edo beste edozein birus isolatzeko; positibo ematen dute egunero eta modu osasungarrian bizi garen birus ugarirekin", adierazi du Egiaren aldeko Medikuak izeneko kolektiboak Facebooken, are sozial horretako erabiltzaileek milaka aldiz partekatu duten irudi batean. Bertan, koronabirusak eragindako pandemia "fartsa bat" dela ziurtatzen da.

Joan den uztailean talde horrek Madrilen egindako aurkezpenaren bideo biral batean, Maria Jose Martinez Albarracin doktoreak argudiatu zuen SARS-CoV-2 birusaren isolamendua ez zela "zehatz-mehatz egin", eta, beraz, PCR probek "positibo eman diezaieketela koronabirus baten edo beste zerbaiten RNAren edozein zatiri".

Alabaina, gaitza atzemateko erabiltzen diren PCR probak guztiz fidagarriak dira, SARS-Cov-2 koronabirusarenak bakarrik izan daitezkeen genomaren zatiak detektatzen dituztelako, eta hori akatsak saihesten dituen prozedura baten bidez egiten du, beste birus batzuen geneekin bat ez datozen hiru sekuentzia desberdin alderatzen baititu.

Adituek hala baieztatu dute, eta Espainiako Medikuen Elkargo Ofizialen Kontseilu Nagusiak (CGCOM), berriz, informazio-espedientea ireki dio dagoeneko Egiaren aldeko Medikuak izeneko kolektiboari, zenbait elkargok pandemia ukatzen duten profesionalen aurka hartutako neurrien bide beretik, "gaur egun indarrean dauden prebentzio-neurrien aurka zabaldutako mezuekin herritar guztien osasuna arriskuan jar dezaketelako".

PCR proben nondik norakoak

PCR probak diseinatzeko (ingelesezko polimerasaren kate-erreakzioaren siglak), SARS-CoV-2ko koronabirusaren genomaren zati espezifikoak bilatzen dira, GenBank izeneko nazioarteko biltegitik eskuratzen direnak.

Bertan, programa informatiko baten bidez, hainbat ikertzailek birus horretatik jasotako milioika sekuentzia alderatzen dira, zeintzuk diren aldaezinak eta, beraz, birus horren espezifikoak zehazteko.

PCR proba baten prozesu teknikoak hainbat fase ditu: lagina hartzea, hura inaktibatzea (infekziosoa balitz ere), material genetikoa ateratzea eta PCR analisia bera.

Analisi hori, katearen milioika kopia sortzen dituen material genetikoa (DNA RNA bihurtzeko) transkribatuz egiten da, koronabirusaren RNAren hiru sekuentzia genetiko espezifiko zabalduz, eta, bat eginez gero, fluoreszentzia igortzen duten oligonukleotido espezifikoekin batera.

"Laginean hiru fluorokromoen fluoreszentzia emisioa atzematen badugu, emaitza hori positiboa da; bestela, lagina negatibotzat jotzen dugu", azaldu du Gemma Rodriguez-Tarduchy zientzialariak.

Dena dela, "proba egin zen uneko argazki zehatza" da emaitza, eta, ondorioz, pertsona baten egoera islatzen du une jakin batean, lagina atera zaionean, ikertzaileak nabarmendu duenez. "Koronabirusa laginean une horretan bertan dagoela edo ez besterik ez du adierazten".

Horrenbestez, PCR testak COVID-19a atzemateko proba fidagarriak dira; izan ere, SARS-CoV-2 birusa atzemateko erabiltzen diren testak positibo emateko, gaitz horrekin soilik bat datozen sekuentzia genetikoak aurkitu behar dira, eta ez koronabirus berriarekin zerikusirik ez duten bestelako RNA zatiak.