Sagardui: "Osakidetzak txertoa jartzeko logistika, langileak eta eskarmentua ditu"

Aurrena helduko den txertoaren edo haren ezaugarrien berririk ez dutela adierazi du Gotzone Sagardui Eusko Jaurlaritzako Osasun sailburuak, baina txertoa jartzeko ardura Osakidetzak izango duela gogorarazi du, horretarako “beharrezko logistika, langileak eta eskarmentua” dituelako. Zentzu horretan, farmazien parte-hartzea beharrezkoa izango denik ez du uste.

Ganberaren kontrol saioan, botiken paperaren inguruan galdetu dio Carmelo Barrio PP+Csko legebiltzarkideak Osasun sailburuari; izan ere, Osasun Ministerioak, azaroaren 18ko lurralde arteko batzordean, proba azkarrak egiteko “atea zabaldu” zien farmaziei.

Dagoeneko Frantziako farmazietan proba azkarrak egiten ari direla gogorarazi du Barriok, eta Europar Batasunak “planteamenduari oniritzia” eman diola. “Madril eta Katalunia protokoloak prestatzen ari dira”, jakinarazi du. Botikak proba horiek egiteko “erabat prest eta kualifikaturik” daudela uste du legebiltzarkideak.

Sagarduik, ostera, PPk esan bezala, Osasun Ministerioak farmaziei probak egiteko “baimena” eman dienik ukatu du. Horrela egin nahi duten erkidegoei txosten “xehatuak” eskatu dizkie, sailburuak argitu duenez.

Azaldu duenez, birusari aurre egiteko test antigeno masiboak ez egiteko gomendioa eman zuen Europar Batasunak, eta ministroak horren berri eman zien erkidegoei, baina erkidegoren batek egiteko asmoa baldin bazuen, txosten “oso xehatua” aurkeztuko beharko du, nola egingo duen azaltzeko, Ministerioak “sakon” azter dezan.

Gainera, Osasun Produktu eta Botiken Espainiako Agentziak azaroaren 20an zehaztu zuenez, antigeno probak osasun eta laborategiko langileek egin behar dituzte, laginak, entseguak, emaitzen irakurketa egin eta horiek osasun agintariei jakinarazteko. “Egun, Euskadiko botikek ez dituzte indarrean dauden legezko baldintzak betetzen”, azaldu du.

Espainiako Gobernuak iragarritako txertaketa planaren baitan farmaziek izango duten parte-hartzeari dagokionez, iragan asteazkeneko lurralde arteko kontseiluan txertoa jartzeko egitasmoa mahai gainean izan ez zela kritikatu du sailburuak, “berehalakoan” arreta jarri zuten, Gabonen ospakizunean, hain zuzen ere.

Aurrena helduko den txerto motaren berri ez dutela azpimarratu du Sagarduik, ezta zenbat dosi iritsiko diren eta haien ezaugarriak ere, baina txertoak jartzeko ardura Osakidetzak izango duela gogorarazi du.

Botikek probak jasotzeko aukerari dagokionez, “ez da gauza bera listu proba bat egitea eta hisopo baten bidez mukosa nasofaringeako lagin bat hartzea, erizaintzaren teknika bat delako”, adierazi du sailburuak.

“Trebakuntza egokia duten pertsonek egin beharreko teknikaz ari gara”, errepikatu du Sagarduik, proba egin ahal izateko edo emaitzen tratamendu pribatua bermatzeko instalazioak hizpide izan baino lehen.

Azkenik, Osasun Sailarentzako farmaziak “herritarren osasun politikak sustatzeko eragile erabakigarria dira”, eta eurekin lankidetza “oso estua eta ezinbestekoa da, herritarrei zerbitzurik onena emateko”, erantsi duenez.

Hala ere, botikek COVID-19a antzemateko probetan “parte-hartze aktiboa” izateko aukera planteatu baino lehen, “zalantza asko argitu behar dira”, nabarmendu du Sagarduik.