Bost urte eta zortzi hilabeteko kartzela zigorra ezarri diote Iruñeko harrapaketaren egileari

Iruñeko Zigor arloko 2. epaitegiak bost urte eta zortzi hilabeteko kartzela zigorra ezarri dio maiatzean hiriburuko Baiona etorbidean autoarekin harrapatuta gizon bat hil zuen gidariari, Diario de Navarra eta Diario de Noticias de Navarra egunkariek gaur jakinarazi dutenez.

Zigortua, 26 urteko gizasemea, kartzelan zegoen gertakari lazgarria jazo zenetik. Epaiketan, egindakoa aitortu zuen eta barkamena eskatu zion hildakoaren familiari. Guztira, hiru delitu egotzi dizkiote: zuhurtziagabekeria larriagatik giza hilketa eragitea, ausarkeriaz gidatzea eta istripuaren lekutik alde egitea.

Harrapaketa maiatzaren 28ko goizaldean jazo zen, Iruñeko Donibane auzoan. Biktima, 32 urteko gizona, Martin Azpilcueta kalearen parean oinezkoen pasabidea gurutzatzen ari zen, autoak semaforoa gorrian pasatu eta aurretik eraman zuenean. Harrapaketaren lekutik 80 metrora agertu zen gizonaren gorpua (bertan hil zen).

Gidariak ez zuen autoa gelditu eta ihes egin zuen. Handik gutxira atxilotu zuten, Arga ibaiaren parean, hanka egin nahian.

Biktimaren familiak bederatzi urteko kartzela zigorra eskatzen zuen, eta Fiskaltzak, zazpi eta erdikoa. Azkenean, defentsak galdegindako bi aringarri hartu ditu kontuan epaitegiak. Batetik, sortutako kaltea konpontzeko aringarria, zigortuak 10.000 euro ordaindu baitizkie jada biktimaren senitartekoei, eta beste 7.000 euroko kalte-ordainari egin beharko dio aurre, eragindako minagatik. Bigarren aringarria edanda eta drogen eraginpean egotea da; izan ere, positibo eman zuen alkohola eta drogak detektatzeko proban (kokaina eta MDMA kontsumitu zituen).