EAEko udalerriek parkeak eta gune publikoak itxi dituzte gaur arratsaldean Euskadi astinduko duen haizeagatik

Haizeagatik gaur 21:00etatik 24:00etara eta ostegunerako 00:00etatik 03:00etara aurreikusitako alerta laranja dela eta, EAEko udalek hainbat segurtasun-neurri hartu dituzte, eta, besteak beste, parkeak eta hainbat espazio publiko osorik edo partzialki itxi dituzte.

Gasteizen, Udalak Larrialdi Plana izango du aktibo 18:00etatik aurrera, larrialdi aurreko fasean, haizeteengatik. Gainera, zenbait parke publiko ixteko agindu du.

Donostian, Cristina Enea, Serafin Baroja eta Memoriaren parkeak itxita egongo dira asteazken honetan, 21:00etatik aurrera. Bestalde, Aiete, Urgull eta Miramarreko parkeetan itxiera partziala izango da. Horrez gain, olatuengatik bihar ezarriko duten alerta dela eta, Pasealeku Berrian bidea itxiko diete autoei 05:00etatik aurrera, eta oinezkoei 12:00etatik aurrera. Ordu horretan, Zurriolako kaia eta Haizearen Orrazirako sarbidea ere itxiko dituzte.

Bilbon, leihoak itxi, loreontziak kendu eta aldamioak segurtatzeko eskatu du Udalak, eta, horrez gain, ahal den neurrian, autoa ez hartzeko eskatu die herritarrei.

Getxon, Udalak Babes Zibileko Udal Plana aktibatu du, 0 egoeran. Horregatik, Zugatzarte pasealekutik eta Maximo Agirre kaletik ez ibiltzeko gomendatu dute, zuhaitz handiak baitaude. Aurreikuspenen arabera, Ereagako igogailuaren funtzionamenduan eragina izango du, eta segurtasun-arrazoiak direla eta, baliteke tarteka zerbitzua etenda egotea.

Gainera, garabiak, dorreak, aldamioak eta abar jartzeaz arduratzen direnei alertaren egoeraren berri eman diete, eta ostalariei SMS mezuak bidali dizkiete egoeraren berri emateko. Era berean, hondakinen edukiontziei eusteko sistemak jarriko dira ageriko eremuetan ohikoak diren lekuetan.

Oinarrizko gomendioak haize gogorraren aurrean

Gainera, udalek arreta handiz ibiltzeko eskatzen diete herritarrei, eta gomendio batzuk eman diete, arrisku-egoeren aurrean arriskurik ez hartzeko.

Horrela, zuhaitz-eremuetan ez ibiltzeko, eta ateak, leihoak eta toldoak ondo ixteko gomendatu diete herritarrei, eta loreontziak eta kalera eror daitezkeen objektu guztiak kentzeko eskatu diete.

Halaber, mendira ez joateko gomendatu dute, behar-beharrezkoa ez bada, eta, beharrezkoa bada, arretaz ibiltzeko eskatu dute. Horma, zuhaitz edo publizitate-hesietatik urruntzeko eta eraikitzen ari diren edo egoera txarrean dauden eraikinen ondotik kontuz pasatzeko gaineratu dute. Horrez gain, aldamio, garabi eta obrako beste elementu batzuei ondo heltzeko beharra nabarmendu dute.

Errepideetatik ahalik eta gutxien ibiltzeko, eta, batetik bestera joan behar izanez gero, kontu handiz egiteko eskatu dute. Halaber, kontu handiz ibili behar da tuneletan sartu edo horietatik ateratzeko orduan, haize-zurrunbiloak sortzen baitira. Gainera, poliki eta arretaz gidatzeko gomendatzen da, bidean oztopoak egon daitezkeelako eta autoaren kontrola galtzea eragin dezaketen haize-kolpeak izan daitezkeelako, batez ere beste ibilgailu batzuk aurreratzeko orduan.

Olatuen aurrean jokatzeko oinarrizko aholkuak

Itsasaldeko arriskuagatiko alertari dagokionez (ostegunean, 12:00etatik 24:00etara), Getxon, adibidez, hondarrez betetako zakuak jarriko dituzte Ereaga inguruko turismo-bulegoan eta jatetxeetan, eta Udaltzaingoak ingurua zainduko du (batez ere itsasgoran), Ereaga pasealekuaren eta Portu Zaharraren arteko errepide zatia itxi behar den erabakitzeko.

Olatuen kasuan, haize bortitzen intentsitatearen ondorioz sor daitezkeen marea eta olatuen kalteak jasan ditzaketen lekuetatik aldentzeko gomendatu dute, itsasontziak ez erabiltzeko eta amarrak berrikusteko, eta, horrez gain, uretako kirolik ez egiteko eskatu dute.