Euskalmeten arabera, apirila beroa eta oso lehorra izan da

Euskal Meteorologia Agentziaren arabera, apirila beroa eta oso lehorra izan da Euskadi osoan. Apirileko batez besteko tenperaturak 13-14 ºC ingurukoak izan ziren kostaldean, eta Arabako Lautadan, berriz, 10 ºC ingurukoak. Balio horien arabera, Euskadi osoan 0,9 ºC-ko anomalia positiboa izan da 1981-2010eko batez bestekoarekin alderatuta.

Tenperaturak batez bestekoaren oso gainetik ibili ziren eta tenperatura altuen errekorrak ere hautsi ziren. Lehenengo hamabostaldian egun beroak izan ziren nagusi, eta anomalia oso deigarriak gertatu ziren. Apirileko tenperatura altuen aurreko errekorrak gainditu ziren, bai balio maximoei dagokienez, bai minimoei dagokienez.

Tenperatura horiekin batera, espero zitekeena baino handiagoa izan da intsolazioa, % 20 eguzki-ordu gehiago izan baitira kostaldean eta % 30 gehiago Arabako hegoaldean. Hiriburuz hiriburu, Bilbok 168 eguzki-ordu izan zituen, Donostiak 190 eta Gasteizek 206. Kostaldeko gau tropikalak (20 ºC-tik gorako tenperatura minimoak) bereziki aipagarriak izan ziren, apiril batean erregistratu diren lehenengo aldia izan baita. 

Ia Euskadi osoan, batez besteko euriaren erdia baino gutxiago egin du, bereziki isurialde mediterranioan, normala denarekiko % 20-30etik behera egin baitu. Kalifikazio horrekin bat etorriz, euri-egunak normala dena baino gutxiago izan ziren: 2 egun bakarrik Gasteizen, 8 Bilbon eta 11 Donostian. Hilabetean zehar erregistratutako prezipitazioen arabera, hilabetea Arabako Lautadan eta Arabako Errioxan izandako lehorrenetakoa izan da.

Muturreko meteorologiari dagokionez, apirilean zehar Eusko Jaurlaritzak 11 abisu hori aktibatu zituen, horietatik 3 haizeagatik, 2 nabigaziorako olatuen altueragatik, 2 kostaldeko inpaktuagatik, 1 galernagatik, 1 izotzagatik eta 2 basoko sute-arriskuagatik.