1.900 emakumek jarri dute salaketa indarkeria matxistagatik urteko lehenengo lauhilekoan EAEn

EAEko 1.880 emakumek jarri dute salaketa indarkeria matxista kasuengatik urteko lehenengo lauhilekoan, aurreko urtean baino % 5 gutxiagok. Sexu askatasunaren aurkako delituak, bikotekideen edo bikotekide ohien erasoak edo senideenak sartzen dira kopuru horren barruan.

219 emakumek sexu askatasunaren aurkako delituak salatu dituzte urtarrila eta apirila bitartean, aurreko urteko kopuru ia bera (% 0,4 gutxiago), Emakunde Emakumearen Euskal Erakundearen datuen arabera.

Datuak lurraldez lurralde aztertuta, Bizkaian % 29 egin du gora sexu erasoen biktimen kopuruak, 100etik 129ra; Araban % 8 egin du behera, 27tik 25era, iazko datuen aldean; eta Gipuzkoan herena murriztu da, 95etik 63ra.

Orokorrean, bikotekidearen edo bikotekide ohien erasoak jasan dituzten emakumeen kopuruak zertxobait egin du behera, % 5,3 hain zuzen ere, 1.397tik 1.322ra.

Beherakada handiena (% 9,5ekoa) Bizkaian izan da, guztira 649 eraso salatu baitituzte. Gipuzkoan 429 izan dira (% 2 gutxiago), eta Araban, berriz, 244 (% 0,8 gehiago).

Era berean, familia barruko indarkeria kasuek (familiako kideek egindakoa, bikotekideak kenduta) behera egin dute % 6,3, 362tik 339ra jaitsi baitira.