Epaileak espetxera bidali ditu astelehenean Lezon droga-operazioan atxilotutako hiru lagunak

Astelehenean Lezon abiatutako droga-operazioaren zehaztasunak eman ditu ostiral honetan Eusko Jaurlaritzako Segurtasun Sailak. Ohar baten bidez jakinarazi dutenez,  astelehenean atxilotu zituzten hiru lagunak espetxeratzeko agindua eman du epaileak.

Gainera, 14 kilo kokaina, 10.000 euro eskudirutan eta material informatikoa konfiskatu ditu operazio horretan, oraingoz; izan ere, operazioak zabalik jarraitzen du. 

Ertzaintzako Ikerketa Kriminaleko Gipuzkoako Lurralde Zerbitzuak egindako polizia-ikerketa duela hilabete batzuk hasi zen, Donostian bizi den pertsona bat penintsulako hegoaldetik kokaina jasotzen ari zela eta substantzia estupefazienteen trafikoan ari zitekeela jakin zuenean.

Ikerketaz arduratzen ziren agenteek susmatu zuten droga eramateko bereziki prestatutako ibilgailu bat erabiltzekoak zirela. Ibilgailu horrek Donostiara eraman behar zuen droga, eta konboian zihoan, aurretik beste ibilgailu bat zeramala.

Astelehenean, ekainaren 2an, ikerketaren arduradunek droga Gipuzkoara garraiatzen zuen ibilgailua atzeman zuten, eta hura harrapatzeko dispositiboa ezarri zuten Lezon.

Operazio horretan, agenteek gelditzeko agindu ziotenean, droga zeraman ibilgailuaren gidaria ihes egiten saiatu zen, eta ibilgailuarekin polizia-ibilgailuen aurka eta ibilgailu horietatik kanpo zeuden agenteen aurka egin zuen. Agenteek zenbait tiro egin behar izan zituzten, autoak harrapa ez zitzan.

Ihesean, ibilgailu horrek inguruan zihoan beste auto bat jo eta kale-argi baten kontra egin zuen talka. Orduan atxilotu zuten gidaria, baita haren aurretik zihoan konboiko beste ibilgailuko gidaria ere. Operazio horretan bertan, hirugarren inplikatu bat ere atxilotu zuten, kokainaren hartzailea izango zena, antza.

Istripua izan zuen ibilgailua miatu ondoren, 14 kilo kokaina aurkitu zituzten aurreko eserlekuen azpian egindako ezkutaleku batean. Gainera, agenteek 10.000 euro eskudirutan, hutsean ontziratzeko makina bat eta material informatikoa aurkitu zituzten hirugarren atxilotuaren etxebizitzan.

Gipuzkoan ez ezik, Bizkaian, Araban eta Frantzian ere banatu nahi zuten konfiskatutako kokaina. Txikizkako merkatuan salgai jarrita, milioi bat euro inguruko balio izango zukeen.

Polizia-eginbideak amaitu ondoren, hiru atxilotuei droga-trafiko delituak egotzi zaizkie. Ostegunean utzi dituzte epailearen esku, eta hark atxilotuak espetxeratzeko agindu du.

Ikerketak zabalik jarraitzen du, eta ez da baztertzen atxiloketa gehiago egitea.