Hodeiak, euri txikia eta giro freskoagoa, astebururako

Asteburuan, giro grisa nagusituko da oro har, Araba eta Nafarroa hegoaldean eguzki tarteak izango badira ere. Euskalmeten iragarpenaren arabera, fronte baten iritsierarekin eta iparraldeko haizearen ondorioz, hodeiak ugaritu eta tenperatura maximoak jaitsi egingo dira.

Larunbatean, giro goibelagoa eta freskoagoa izango da. Ipar partean, behe-hodeiak nagusituko dira zeruan, eta baliteke euri txikia edo zirimiria egitea. Orduak igaro ahala, ordea, hodeiak gutxituz joango dira eta hodeitza saretuago egongo da egun osoan. Goizean, haizea ipar-mendebaldetik finkatuko da, eta indarra hartuko du arratsaldean. Tenperatura maximoak 20 graduren bueltan kokatuko dira oro har, baina hortik gorakoak neurtuko dira Araba eta Nafarroa hegoaldean.

Igandean, hodeiak gailenduko dira ipar partean, bereziki egunaren erdiko orduetan, eta baliteke euri txikia egitea. Hala ere, beste une batzuetan, ostarteak zabalduko dira, batez ere, arratsaldetik aurrera. Hegoaldean, oro har, giro argiagoa eta epelagoa izango da. Tenperatura maximoak pare bat gradu igoko dira barnealdean, eta berdintsuak izango dira kostaldetik gertu.

Tenperaturaren igoera espero dugu astearen hasieran, batez ere tenperatura maximoei dagokienez. Astelehen goizean, lainogune eta behe-hodei batzuk izango ditugu, baina giro argia nagusituko da arratsalderako. Hala ere, zeruan goi-hodei eta bero-hodei batzuk izango dira. Haizea indar handirik gabe ibiliko da, eta ekialdekoa nagusituko da. Tenperaturek, bai maximoek eta baita minimoek ere, gora egingo dute, eta beroenek 25 ºC-ren muga gaindituko dute barnealdean.

Astearte eta asteazkenerako, berriz, eguraldi ekaiztsua espero da.

Kontsulta ezazu eguraldiaren iragarpena, eta bidali zure argazkiak eta bideoak.