Osakidetzak 23 patologiara zabaldu du jaioberrien baheketa, eta datorren urtean 32 izango dira

Osakidetzak lau gaixotasun berri gehitu dizkio Euskal Autonomia Erkidegoko (EAE) jaioberrien baheketa-programari, eta, ondorioz, 23 patologiara iritsiko da. Datorren urtean, 32 izango dira.

Hala iragarri du Alberto Martinez Osasun sailburuak Eusko Legebiltzarreko kontrol saioan. Bertan nabarmendu duenez, "orpoaren proba" funtsezkoa da "epe luzera" haurtxoen osasuna eta ongizatea bermatzeko; izan ere, goiz esku hartzea eta pronostiko hobea egitea ahalbidetzen du, eta "ezintasun larriak eta hilgarriak saihestu".

Bularreko minbizia

Gainera, Osakidetzak egiten dituen gainerako baheketek ekarri duten biziraupen-tasen hobekuntza azpimarratu du sailburuak. Bularreko minbiziak (EAEko lehen heriotza arrazoia) 715 kasu antzematea ahalbidetu zuen iaz, gehienak oso fase goiztiarretan eta pronostiko onarekin.

1995etik, programa honek 12.663 tumore diagnostikatu ditu, gehienak fase goiztiarretan. Horrela, hilkortasuna % 16 murrizten lagundu du. Baheketan diagnostikatutako emakumeen biziraupena % 92,7koa da 5 urtera.

Kolon eta ondesteko minbizia

Bestalde, kolon eta ondesteko minbiziaren baheketak 4.519 tumore gaizto antzeman ditu programa 2009an hasi zenetik, % 71 hasierako fasetan, eta horrek tratamendu ez hain oldarkorrak erabiltzea eta biziraupen-tasa hobetzea ahalbidetu du. Detekzio goiztiarrak % 30 murriztu dezake hilkortasuna.

Umetoki-lepoko minbizia

Umetoki-lepoko minbiziaren baheketak azterketa sakonagoa eta luzeagoa behar du, baina, hala ere, tumorea diagnostikatzen zaien emakumeen heriotza-tasa % 3ra jaistea lortu du. Tumoreen % 70 hasierako faseetan detektatzen dira, eta horrek biziraupena nabarmen handitzen du.

Gainera, giza papilomaren birusaren aurkako txertoak % 92tik gorako estaldura-tasak erdietsi ditu EAEn, eta zerbixeko minbizia prebenitzeko funtsezko tresnetako bat da.