Aurten ere, sexu-erasoei aurre egiteko informazio gunea, jaiaren erdigunean: Gazteluko plaza

Beste urte batez, Iruñeko Udalak 'Eraso sexistarik gabe, Iruñea aske' kanpainari buruzko informazio gunea jarri du Gazteluko plazan, eta uztailaren 5etik 14ra irekiko dute.

Informazio, sentsibilizazio eta prebentzio gunea da sexu erasoen aurrean, eta erreferentziazko lekua entzute aktiborako eta erasoak salatzeko.

Ez da biktimei laguntzeko zerbitzu bat, baina eskura dituen baliabideei buruzko informazioa emango du, eta ahalmena izango du erasorik izanez gero laguntza zerbitzuak eta protokoloak martxan jartzeko.

Joseba Asiron Iruñeko alkateak, Zaloa Basabe Berdintasun, Auzo, Herritarren Partaidetza eta Euskara zinegotziak eta Txema Mauleon Gizarte Ekintzako zinegotziak informazio gunearen irekiera sinbolikoan parte hartu dute gaur goizean. Informazio gunea uztailaren 5etik, larunbata, uztailaren 14ra arte egongo da martxan, 11:30etik 15:00etara eta 18:00etatik gauerdira arte. Bertako langileek gaztelaniaz, euskaraz, ingelesez eta frantsesez artatuko dute.

Gazteluko plazako informazio gune hau zerbitzu espezializatu baten laguntza behar duten neskei eta emakumeei laguntzeko tokia da, eta informazioa eskaintzen die: nora jo, helbideak, ordutegiak eta laguntza.

Beharrezkoa bada eta emakumeak hala eskatzen badu, arreta eta laguntza protokoloa aktibatuko litzateke. Guneak konfiantza sortzeko eta konfidentzialtasuna eta anonimotasunerako eskubidea bermatzeko tokia du.

Sexu-eraso bat ikusi dutenei

Sexu-eraso bat ikusi dutenei edo informazioa eskatzen dutenei argibideak emango zaizkie dauden baliabideei buruz.

Galdera-sorta anonimo baten bidez, salagarriak ez diren edo salatu ez diren erasoei edo jokabide sexistei buruzko gorabeherak jasoko dira, eta ondoren aztertuko dituzte.

Halaber, Gazteluko plazako gunean kanpainaren materiala banatuko da, hala nola gidak, pinak, eranskailuak edo kartelak. Kanpainari eta eskura dauden baliabideei buruzko informazioa online formatuan ere eskura daiteke.

Orduak eta txandak bikoiztea

Gizarte Ekintza arloko profesionalek bikoiztu egingo dituzte arreta presentzialeko orduak, egunean bi ordutik laura pasatuz, eta asteburuetan ere, hirira jende asko iristen denez, txandak bikoiztuko dira, biktima posible guztiei arreta egokia eman ahal izateko.

Era berean, lan profesionala eta biktimei arreta ematea errazteko, lehen aldiz gune zentriko bat egokituko da erreferentziazko leku gisa, eta etxebizitzak biktimen esku jarriko dira, iaz bezala, baldin eta bisitan izateagatik edo hirian familiarik ez izateagatik, haientzat eta haien familientzat aldi baterako aterpe bat behar duten emakumeak identifikatzen badira.

Azkenik, lan hori egingo duten profesionalen soldata areagotu egin da, batetik, lan garrantzitsua delako, eta, bestetik, lan hori jaiegunetan egin behar delako.