Justiziak EHUri eskatu dio ez ditzala kontuan hartu USaPeko Euskara azterketako zeroak batez besteko notan

Bilboko hainbat epaitegik EHUri eskatu diote Unibertsitatera Sartzeko Probako (USaP) euskara azterketan zero edo zerotik gertuko notak atera zituzten ikaslen kalifikazio hori kontuan ez hartzea batezbestekoa egiteko. 

Bide administratiboa agortuta, auzitara jo zuten euskara azterketan zero atera zuten ikasleen familiek eta kautelazko neurria eskatu zuten: Euskara eta Literatura II azterketako nota batezbestekoa kalkulatzeko orduan aintzat ez hartzea galdegin zuten, eta, beraz, zeroek eraginik ez izatea EHUko aurre-matrikulazioan. Bihar amaituko da horretarako epea. 

Administrazioarekiko auzietarako hainbat epaitegik aintzat hartu dute eskaria, eta gaur kaleratutako ebazpenean EHUri eskatu diote "Euskara eta Literatura II azterketako kalifikazioak" bertan behera uztea eta kontuan ez hartzea USaPeko batez besteko notaren kalkulua egiteko. Horrela, auziari buruzko "behin betiko epaia" izan arte, nota hori erabiliko da EHUren aurre-matrikulazioan eta plaza esleipenetan. 

50 bat ikaslek jo dute auzitara; horietako askok zero eta bi puntu artean atera zituzten. Emaitzekin ados ez, eta berrikuspena eskatu zuten, baina ezer gutxi aldatu zen haien nota. 

Epaileek, bi arrazoi

Erabakia hartzeko epaileek autoan azaldu dituzten arrazoiak bi dira. Batetik, argudiatu dute matrikulazio epea bihar amaitzen dela, eta, beraz, "erabakia premiaz" hartzea beharrezkoa dela, ikasleei erantzun bat emateko.

Bestetik, berriz, magistratuek uste dute balitekeela "ikasleen eta zentroen anonimotasuna bermatzeko prozedura" zalantzan jarri izana azterketak zuzentzean. Ondorio horretara iristeko, familiek froga gisa aurkeztutako El Mundo hedabidearen artikulu bat aipatzen da. Bertan, Joxerramon Bengoetxea EHUko errektorea iturri bezala aipatuz, esaten da aztertzaileek aurrez jakiten dutela zein ikastetxetako ikasleen azterketak zuzentzen dituzten.

Iñaki Picaza salaketa jarri duten hainbat ikasleren abokatua "pozik" agertu da ebazpenarekin, haren hitzetan, "bidegabekeria konpontzen hasi" delako.  

"Oso pozik gaude, kautelazko neurria ezartzea ontzat eman delako. Orain, EHUk epaitegiek esandakoa betetzea espero dugu, eta gaur edo bihar ikasleek matrikula egin ahal izatea", esan du.

EHUk helegitea iragarri du

EHUk dagoeneko iragarri du erabakia errekurritu egingo duela, honako bi arrazoiengatik: "USaP probetara aurkeztu diren gainerako ikasleak babesgabetasun egoeran" uzten ditu eta "berdintasun printzipioa" urratzen du. 

"Kautelazko neurri hori betetzeak legea eta berdintasun printzipioa urratzea ekarriko luke. Unibertsitate publikoak ezin du plazarik gorde unibertsitatera sartzeko ohiko prozeduratik kanpo; izan ere, plazen esleipena sarbide-notaren eta titulazio bakoitzean eskaintzen den plaza kopuruaren arabera egiten da, hautagai guztien lehentasun-hurrenkera zorrotz errespetatuz. Prozedura horretatik kanpo inori plaza bat gordetzeak sarbide-sistema aldatzea eta gainerako ikasleen eskubideei eragitea ekarriko luke", dio EHUk zabaldutako oharrak. 

Halaber, Unibertsitate publikoaren iritziz, kautelazko neurri hori aplikatzeak "ondorio konponezinak" eragin diezazkieke arau berberen arabera USaP proba egin duten gainerako ikasle guztiei. "Berdintasun printzipioa urratuko luke, pribilegio bereziak emanaz auzibidea hartu duten bakanei".

Indarrean dagoen araudiaren arabera "une oro" jardun duela adierazi du berriz EHUk, eta ziurtatu du "zorrotz aplikatu" duela 534/2024 Errege Dekretuan ezarritakoa, "Unibertsitateko gradu-ikasketa ofizialetara sartzeko baldintzak arautzen dituena".

Oharrean, erakunde akademikoak gogora ekarri du "dekretuak berak ezartzen" duela bi hizkuntza ofizial dituzten autonomia-erkidegoetan "ikasleek bi hizkuntzetan" erakutsi behar dutela "gaitasunen araberako nahikotasuna, ez badaude beren-beregi salbuetsita".

"Horregatik, Euskara eta Literatura II ikasgaiaren kalifikazioa unibertsitatera sartzeko eta onartua izateko notaren kalkuluaren parte da, Estatuko araudiak ezarritakoaren arabera", amaitu dute idatzia.