Donostian 400 etxebizitza babestu egiteko aurrerapauso garrantzitsua: Udalak Txomin Enea II birpartzelatzeko proiektua onartu du
Tokiko Gobernu Batzarrak hasierako onarpena eman dio hirigintza-kudeaketarako tresnari, Martuteneko kartzela zaharreko lurrak garatzeko. Etxebizitza horiek “donostiarrentzat etxebizitza-aukera” izan behar direla baieztatu du Jon Insausti alkateak.
Jon Insausti alkatea prentsaurrekoan. Argazkia: Donostiako Udala.
Espainiako Gobernuarekin eta Eusko Jaurlaritzarekin hiruko akordioa lortu ondoren, beste urrats bat eman du Donostiako Udalak Txomin Enea II garatu ahal izateko. 400 etxebizitza, ekipamendu publikoak eta espazio libre berriak aurreikusi dituzte. Horretarako, ezinbesteko urratsa da aurretiaz birpartzelazioa egitea.
Gaur eman dio udal gobernuak hasierako onespena, ondoren urbanizazio-lanak egin ahal izateko eta, azkenik, aurreikusitako bizitegi-sustapenak eraikitzeko, Jon Insausti alkateak azaldu duenez. Proiektua jendaurrean jarriko da orain, alegazioak aurkezteko epea irekiko baitira, horren ondoren behin betiko onespena emateko. Aldi berean, etxebizitzak eraikitzeko beharrezko kudeaketa-tresnak lantzen aurrera egingo duela iragarri du Udalak.
Funtsezko tresna teknikoa
Birpartzelazio-proiektua hirigintza-kudeaketarako tresna juridiko eta teknikoa da, lur zatiak berrantolatzen dituena. 35.327 metro karratuko azalera du Txomin Enea II egikaritze-unitateak, % 66 Udalaren jabetzakoak (espetxe zaharraren inguruko lursailak eta tranbiaren lursail zaharrarenak) eta % 34 Justizia Ministerioaren jabetzakoak (espetxeak berak hartzen zuen lursaila). Erakundearteko akordioaren helburua da lursail horiek guztiak hartu eta plangintzaren arabera antolatzea: 5 lursail etxebizitzak egiteko eta hainbat ekipamendu (berdeguneak, espazio libreak, bide-sarea eta zuzkidura-etxebizitzarako partzela bat).
Etxebizitzak, donostiarrentzat
Insaustik nabarmendu duenez, “lurzoruak eraldatzen" dihardu, "donostiarrentzako etxebizitza-aukera berriak lortzeko”. Hori dela eta, azpimarratu duenez, Udalaren “borondatea” da bere partzelak Eusko Jaurlaritzaren esku uztea, baina “hiru baldintza garrantzitsu” aipatu ditu: eraikitako etxeak “donostiarrentzat izatea”, inplikatutako hiru erakundeek “kostuak banatzea” eta epeak betetzea.
Alkateak ohartarazi du ez duela nahi “Txomin Enea I-ekin gertatu zena berriro gertatzea, zortzi urtez geldirik egon baitzen”. Hori dela eta, adierazi du Eusko Jaurlaritzarekin negoziatzen jarraituko duela lurzatiak uzteko, baina betiere “hiru baldintza horiek” aintzat hartuta.
Zure interesekoa izan daiteke
Nafarroako Gobernuak gogoratu du indarkeria matxistaren aurrean emakumeak ez daudela bakarrik eta babes-sare oso bat dutela
Garabi handiak lanean ari dira Donostia Ospitaleko protoiterapia ekipoa instalatzeko
Eusko Jaurlaritza ume txikiak dituzten familientzako laguntzak ordaintzen hasi da
Gizon baten bila ari dira Oviedon, emakume bati tiro egin eta motxila baten barruan lehergailu bat utzi baitu
Maldita.es fundazioak TikToken haurren aurkako sexu abusuen 1.000 bideo baino gehiago salatu ditu
Eraso homofoboagatik Iruñean atxilotutako bi pertsonak aske utzi dituzte, biktimei hurbiltzeko debekuarekin
"Garrak, momentu batzuetan, 10 metrorainokoak ere izan dira"
Minbiziari aurre egiteko protoien azeleragailua instalatzeari ekingo diote Donostiako Unibertsitate Ospitalean
