Ondoezaren arrazoiak

Halako batean leherketak bata bestearen atzetik etorri zaizkigu. Aldarrikapena protesta bilakatu da eta kexa istilu. Kaleak sutan dira Bolivian eta Txilen,Libanon eta Iraken, Iranen eta Georgian. Lehen manifestazioen eragileek txikikeriak dirudite, Txilen metro txartelaren garestitzea, Iranen oso merke duten gasolinaren igoera, Libanon WhatsapApparen bidez egindako deien prezio aldaketa … Guztietan lehen protesta baketsuak berehala amorru leherketak bihurtu dira. Poliziak eta soldaduek berriz inongo errukirik gabe zanpatu dituzte kalera irten direnak.

Egun hauetan leku eta arlo askotako adituak ahalegindu dira gertatutakoaren argibideak ematen, sakoneko eragileak azaltzen, arrazoiak … baina asko eta kontrajarriak dira, gehienek diote hala ere jendea haserre dagoela krisiak asko eta askoren bizimodua okertu eta hondatu duelako eta agintariak ez direlako gai izan lehendabizi hori antzematen eta gero konponbideak aurkitzen. Baina Munduko erakunde eta ikerketa erakunde nagusiek diote gizateriaren egoera inoiz baino hobea dela.

XIX. mende hasieran muturreko pobrezian bizi zirenak gizateriaren %90 ziren.1980n % 50 eta gaur egun ez dira %10ra iristen. Antzerako hobekuntzak aurkituko ditugu alfabetatzeari buruz, haurren heriotza tasaz edo pobreziaz. Azken krisiak jende askori min egin badio ere, oro har azken 25 urtetan askoz gehiago dira pobrezia egoera gainditu eta bizimodua ondutakoak. Inoiz baino hobeto gaudela diote adituek eta ongizateaz arduratzen diren erakundeek.

Baina globalizazioak mundualizazioa ekarri digun garai hauetan, teknologiak istant batean edozein lekutan gertatzen ari dena jakiteko aukera ematen diguten sasoi hauetan,ez omen da aldatu gizakion sakoneko sena, Mundua norberarengan hasi eta amaitzen da, garrantzitsuagoa da gure egoera eta gertatzen ari denari buruz eraiki dugun ikuspuntua benetan gertatutakoa baino. Azken urtetan Espainiako Estatuan egindako inkesta guztietan erabateko gehiengoak erantzuten du egoera orokorra txarra edo oso txarra dela, baina berehala azpimarratzen dute beraiena ez dela hain txarra eta gehiengo batek ona dela aitortzen du.

Ezin ditugu herrialde askotako kaleetara irten direnen arrazoiak gutxietsi, oinazeak, ezinegonak eta amorruak eragile asko dute,baina agian Munduan gertatzen ari denaz beste irudi bat osa liteke. Hau idazterakoan Munduak 7.760 miloi biztanle ditu,egunero Munduan 400 mila haur jaiotzen dira. Gizakiok ditugun beharrak asetzeko eta ongizatea ziurtatzeko gero eta baliabide gehiago behar dugu,eta dirudienez azken urtetan inoiz baino jende gehiagorengana iritsi da aberastasun hori, guri justu kontrakoa iruditu arren. Baina egia da ase ezintasuna dela gizakion garapenaren eragile nagusia, eta gehienetan protesta egiteko arrazoiak badaudela.