Bidenek boto zenbaketa irauli eta Trumpi aurrea hartu dio Pennsylvanian
Joe Biden Alderdi Demokratako hautagaiak Donald Trump AEBeko presidenteari aurrea hartu dio Pennsylvaniako boto zenbaketan. Hauteskunde gauetik lehian dagoen estatuetako bat da, eta Trumpek ezin ditu bozak irabazi, bertan garaipena erdietsi gabe.
Ostiral honetako datuen arabera, Bidenek 3.295.000 boto baino gehiago eskuratu ditu, eta Trumpek 3.290.000 baino zertxobait gutxiago. Portzentajean aldea hamarren batekoa da soilik, CNN telebistak zehaztu duenez.
Konkretuki, zenbatu diren 31.671 bozetatik 27.396 lortu ditu Bidenek; Trumpek, ostera, 3.760 baino ez. Aldea nabarmenagoa da Filadelfian; izan ere, Bidenek 553.953 boto eskuratu ditu hirian, eta presidenteak 125.513.
Pennsylvanian garaipena lortzen baldin badu, Biden Ameriketako Estatu Batuetako presidente hautetsi izendatuko lukete, beste estatu batzuetan gertatzen denari itxaron beharrik gabe. Hautagai demokratak 253 hautes-boto bildu ditu oraingoz, eta 270ko langa gainditu behar du presidente izendatzeko. Honenbestez, Pennsylvaniako 20 ordezkariak lortzen baldin baditu, presidentetza bereganatuko luke.
Posta bidezko botoak Trumpen aurka egin du zenbait estatutan, inkestek iragarri bezala. Demokratek boto sistema hori aukeratu dutela begi-bistakoa da. Hala ere, presidenteak “iruzurra” salatu du, hori bai, inolako frogarik aurkeztu gabe.
Pennsylvanian ez ezik, Alaska, Arizona, Nevada, Ipar Carolina eta Georgian ez da zenbaketa amaitu. Georgian ere, Bidenek Trumpi aurrea hartu dio.
Boto zenbaketa berria Georgian
Hala ere, boto zenbaketa berria egingo dutela iragarri du Georgiako estatuak, emaitza estuak ikusita. Horrela gauzak, baliteke azarora arte itxaron beharra, hauteskundeak estatu horretan nork irabazi dituen jakiteko.
“Alde hain txikia izanda, beste zenbaketa bat izango da Georgian”, adierazi du Brad Raffensperger bertako Estatu idazkari errepublikanoak.
Hautagai irabazlearen aldea % 0,5 baino txikiagoa denean boto zenbaketa berri bat eskatzeko aukera ematen du Georgiako araudiak, eta Bidenen abantaila % 0,1 baino txikiagoa da oraingoz.
Hala eta guztiz ere, Bidenek ez du Georgian irabazi beharrik 270 ordezkariak ziurtatzeko, eta Etxe Zurira iristeko: Pennsylvanian garaipena erdietsiz gero, 284 hautes-boto eskuratuko lituzke, komunikabide nagusien arabera.
Zure interesekoa izan daiteke
Zibererasoa egin diete Belgika eta Suediako dozenaka supermerkatutako hozte-sistemei
Trumpek Kongresuaren kontrola izango du jokoan agintaldi erdiko hauteskundeetan
Bi petrolio ontzi gehiagok egin dute itsas minekin talka Ormuzen, Iranen arabera
Iliana Yotova hautagai errusiazaleak irabazi ditu Bulgariako presidentetzarako hauteskundeak
Hegazkin pribatu bat Palm Beacheko etxe-gune batean erori den unea
Erregaiaren prezioak kamioilariak estutu eta AEBko ondoez ekonomikoa larriagotzen ari da
Ehun bat zauritu eta 13 atxilotu Portugalen, etxebizitzaren aldeko kanpaldiak berriro hustu ondoren
Dozenaka kanpadenda jarri dituzte Erromako Koliseoaren aurrean, bizitzaren kostua garestitzearen aurka protesta egiteko
Manifestazio jendetsuak izan dira hirugarren larunbatez Frantzian, eta 500 lagun baino gehiago atxilotu dituzte
