NBEko Segurtasun Kontseiluak lehen aldiz eskatu du "berehalako" su-etena Gazan

NBEko Segurtasun Kontseiluak Gazan su-etena eskatzen duen ebazpen bat onartu du gaur, lehen aldiz eta aurretik huts egindako lau saiakeren ondoren. Izan ere, Israelen etengabeko erasoek 32.300 pertsona hil dituzte sei hilabete baino gutxiagoan.

Ebazpenak 14 babes jaso ditu bozketan, kontrako botorik ez, eta abstentzio bakarra izan da, Ameriketako Estatu Batuena. Ekimena onartzean aretoan txaloak izan dira, oso gutxitan gertatzen dena. Errusiak eta Txinak iragan ostiralean Washingtonek aurkeztutako ebazpen proposamen bati betoa jarri ostean gertatu da.

Ebazpenean, Kontseiluak "berehalako su-etena eskatu du Ramadaneko hilabetean (apirilaren 9an amaitzen da), horrek su-eten iraunkorra ekar dezan", eta, aldi berean, Hamasen esku dauden "bahitu guztiak berehala eta baldintzarik gabe askatzea" eskatu du; baina ez ditu bata bestearekin lotzen.

Era berean, "laguntza humanitarioa sartzeko eta Gazako Zerrendan zibilen babesa indartzeko premia larria" azpimarratu du, eta Israeli (aipatzen ez duenari) "laguntza humanitario horri oztopo guztiak kentzeko" eskatu dio.

Ebazpena Kontseiluko hamar kide ez-iraunkorrek aurkeztu dute, eta horien artean Afrikako, Asiako, Europako eta Latinoamerikako estatuak daude. Horrek munduak duen premiazko pertzepzioaren ideia ematen du.

Hala ere, azken minutura arte zalantzak egon dira, izan ere, Errusiak aparteko bozketa bat eskatu du, baina ez dute onartu.

Antonio Guterres NBEko idazkari nagusiak apokalipsiarekin alderatu zuen igandean Gazan gertatutakoa: "Gazara begira, badirudi gerrako, goseko, konkistako eta heriotzako lau zaldunak bertan direla", esan zuen Egipton, palestinarren zigor kolektiboa ezerk justifikatzen ez duela nabarmendu ondoren. NBEko idazkari nagusiak txalotu egin du gaur ebazpena onartu izana, eta gogorarazi du "barkaezina" litzatekeela "aplikatzeko orduan porrot egitea".

Aurretan, Ameriketako Estatu Batuek -Israelen aliatuak- hiru ebazpen atzera bota zituzten, Washingtonen arabera su-eten batek Hamas berriro armatzea ahalbidetuko lukeelako.

Israeli Gazan su-etena aldarrikatzeko ekimenak bertan behera geratu dira orain arte, nahiz eta gero eta estatu gehiagok bat egin duten dei horiekin, europarrak barne -Frantzia, Alemania edo Erresuma Batua-, hasieran Israeletik hurbilago zeudenak, eta beste aliatu batzuk ere, Kanada edo Japonia bezala eboluzionatuz joan direnak, AEB estatu sionistaren azken aliatu bezala geratuz.

Netanyahuk bertan behera utzi du bere aholkulariek AEBra egin behar zuten bidaia

Benjamin Netanyahu Israelgo lehen ministroak bertan behera utzi du bere aholkulari nagusietako bik aste honetan Washingtonera egin behar zuten bidaia, AEBk ez dutelako gaurko bozketan beto eskubidea erabili, abstenitu egin baita. Washingtonek Netanyahuren erabakia deitoratu du.

Ia aldi berean, Israelgo Gobernuak iragarri du Nazio Batuen Errefuxiatu Palestinarrentzako Agentziarekin (UNRWA) lan egiteari utziko diola. Estatu sionistak "gatazka betikotzea" leporatu dio erakundeari, Hamasekin dituen ustezko lotura frogatu gabeengatik. "UNRWA arazoaren zati bat da, eta ez dugu haiekin aurrerantzean lan egingo", adierazi du David Mencer Israelgo Gobernuko bozeramaileak bere eguneroko prentsaurrekoan.

Hamasek pozik hartu du ebazpena, eta Israeli presioa egiteko eskatu du. "Ontzat ematen dugu NBEko Segurtasun Kontseiluak Gazan berehalako su-etena ezartzeko egindako deia. Azpimarratu nahi dugu su-eten iraunkorra lortu behar dela, indar sionistak atzera egiteko eta desplazatuak itzultzeko", adierazi du talde islamistak, Filastin egunkariaren arabera.

Palestinar Aginte Nazionaleko Atzerri Ministerioak ekimena ospatu du, baina neurri "iraunkorra" izan behar dela uste du.

Bestalde, Gustavo Petro Kolonbiako presidenteak Israelekin harreman diplomatikoak eteteko deia egin dio nazioarteari, ebazpena betetzen ez badu.

Jose Manuel Albares Espainiako Atzerri ministroak pozik hartu du Segurtasun Kontseiluak "azkenean" berehalako su-etena eskatzen duen ebazpen bat onartu izana.