"Abortu" hitzik ez, Ukrainarentzako laguntza gehiago eta Venezuelari abisu berri bat G7aren bileran

G7 taldeko buruzagiek Borgo Egnazia Italiako luxuzko hotelean egindako goi-bileran Ukrainaren defentsa sutsua egin dute, Errusiako aktiboekin finantzatutako milioi askoko mailegu handi batekin. Bestalde, Venezuelari beste abisu bat eman diote. Hala ere, goi-bileraren amaieran "abortu" hitzak piztutako polemika izan da protagonista. Azkenean, hitza adierazpenetik desagertu da.

Alemania, Kanada, AEB, Frantzia, Italia, Japonia eta Erresuma Batuko agintariek mundu mailako geopolitika gaiak jorratu dituzte. Hona hemen 36 orrialdeko agiri baten gakoetako batzuk, negoziazioen emaitza:

- "Abortuaren" polemika: Borgo Egnaziaren goi-bilera nahastu egin du abortuaren defentsak. Hitz hori, azkenean, ez da azken adierazpenean agertzen. Giorgia Meloni Italiako agintari ultraeskuindarrak eta Emmanuel Macron Frantziako presidenteak agerian utzi dute bien arteko desadostasuna.

Azkenik, buruzagiek berretsi egin dute Hiroshimako iazko adierazpenarekin zuten konpromisoa. Adierazpen hartan, "abortu legala eta abortatu osteko arreta" mahai gainean jartzeko konpromisoa hartu zuten.

Hau izan da adostutako testua: "Gure konpromisoak berresten ditugu 'Hiroshimako Buruzagien Agiria'rekin, emakumeentzako osasun-zerbitzu egoki, eskuragarri eta kalitatezkoen alde, osasuna eta guztientzako sexu- eta ugalketa-eskubide integralak barne, unibertsalki eskuratzeko". Abortu hitza, baina, ez dute inon jaso.

- Kievi emandako mailegua Errusiako aktiboetatik abiatuta: G7aren lehen akordioa Ukrainarentzako 46.000 milioi euroko mailegu bat izan zen, eta mundu osoan, gehienbat Europar Batasunean, izoztutako aktibo errusiarretatik sortzen diren interesekin finantzatuko da. Moskuk dagoeneko ohartarazi du neurri horrek ondorio "oso mingarriak" izango dituela.

- Hauteskunde "garbiak" Venezuelan: Italiaren txandakako presidentetzak arreta berezia eskaini nahi izan dio Iberoamerikari, eta, horregatik, taldeak hauteskunde "libreak" eskatu dizkio Venezuelari uztailaren 28an, behatzaileekin, 'Barbadosko Akordioa' errespetatuz, eta "oposizioko kideen jazarpena eta preso politiko guztien atxiloketak" amaitzea.

- Errusiari laguntzen dioten Txinako erakundeen aurkako "ekintza sendoak": Kremlini Mendebaldeko zigorrak saihesten laguntzen ari diren banku txinatarrak eta armak fabrikatzeko teknologia eskuratzen laguntzen dioten enpresa txinatarrak zigortzeko konpromisoa ere iragarri dute buruzagiek.

- Txinako merkataritza-praktika "bidegabeak": Txinako merkataritza-praktika "bidegabeei" buruzko kezka ere azaldu dute buruzagiek, eta Asiako erraldoiaren hazkundea eragotzi nahi ez duten arren, Pekinek nazioarteko merkataritza arautzen duten legeak betetzea nahi dutela esan dute.

- Irani mehatxu egin diote Errusiari Ukrainan laguntzeagatik: G7 taldeko buruzagiek Irani ohartarazi diote "azkar eta modu koordinatuan erantzuteko aukeraz, baita neurri gehiago eta garrantzitsuak hartzeko aukeraz ere", Teheranek Ukrainako gerran Errusia "misil balistikoak eta teknologia" eskainiz babesten jarraitzen badu; izan ere, "mehatxu zuzena da Europako segurtasunarentzat".