Atzerapenak gorabehera, igandean hasiko dira bahituak askatzen, Netanyahuren arabera

Benjamin Netanyahu Israelgo lehen ministroak ziurtatu duenez, Gazan su-eten akordioa onartzeko egon diren atzerapenek ez diote prozesuari eragingo, eta aurreikusita zegoen bezala, igandean hasiko da Hamas bahituak askatzen.

"Israelgo segurtasun kabineteak eta Gobernuak su-etenaren akordioa onartu eta berau aplikatzeko prozesuari dagokionez, hasiera batean ezarritako eskemari helduko diogu, bahituak igandean bertan aska ditzaten", esan du Netanyahuren bulegoak X sarean duen profilaren bidez. 

Israelgo agintariek lehen fasean libre geratuko diren 33 bahituen izen-abizenak argitaratu ditu. Bahitu horiek, baina, bizirik edo hilda egon daitezkeela ohartarazi du. Zerrenda horretan, Frantziako nazionalitatea duten bi pertsona daude, Emmanuel Macron Frantziako presidenteak zehaztu duenez.

Espero zena baino gehiago katramilatu da meniaren onarpena, baina, azkenean, bi aldeek Dohan (Qatar) —han negoziatu dute menia— dituzten ordezkariek ostiral goizean sinatu dute akordioa.

Hori dela eta, guztia prest dago Israelgo Gobernuak ituna bozkatzeko. Tel Aviven 12:00ak jota zirenean hasi da batzarra (11:00ak Euskal Herrian).

"Bonbardaketak areagotu ditu Israelek"

Bien bitartean, Hamas Erresistentzia Mugimendu Islamikoak su-etena "oztopatu nahian" ibiltzea egotzi dio Israeli, azken orduetan Gazan egindako bonbardaketak "areagotu" dituela argudiatuta. Meniaren akordioa iragarri zenetik, 100 pertsona hil ditu Israelek.

"Okupazio kriminala nahita ari da sarraskiok egiten, su-etena eragozteko asmoz. Bitartekariek —Qatar, Egipto eta AEB— presioa egin behar diote gerra kriminal horri eta bere gobernu faxistari erasoak geldiarazi ditzan", nabarmendu du ohar bidez.

Aurrez, Antony Blinken AEBko Estatu idazkariak esan du konbentzituta dagoela akordioa igandean sartuko dela indarrean, nahiz eta Israelek eta Hamasek elkarri akordioa atzeratzea leporatu.

"Konfiantza dut, eta espero dut igandean indarrean sartzea", adierazi du diplomazia estatubatuarraren buruak kargua utzi aurretik emandako azken prentsaurrekoan.

Era berean, oraindik Gazan dauden bahituen senideek larritasunez hartu dute tira-bira, lehen bahituak ateratzeko adostutako datatik hiru egun baino gutxiagora. Hamasek, berriz, Israelek Gazan egindako eraso bat salatu du, askatu behar zuten bahitu bat zegoen leku baten aurka, eta edozein bonbardaketak "gatibu baten askatasuna tragedia bihur dezake", ohartarazi du.

Su-etena igandean sartu beharko litzateke indarrean, eta bahituak (bizirik edo hilda) askatzea eta Gazan laguntza humanitarioa eskuratzea ahalbidetuko luke. Israelek 46.700 pertsona baino gehiago hil ditu 2023ko urriaren 7tik, eta 83 azken orduetan.

Akordioaren zirriborroa

Akordioaren zirriborroaren arabera, su-etenak 42 eguneko hiru fase aurreikusten ditu.

Lehen fasean, 33 bahitu askatuko lituzkete (emakumeak, adingabeak, 50 urtetik gorakoak, gaixoak eta zaurituak), eta 50 urtetik beherako gizonak, soldaduak barne, bigarren fasera arte ez lituzkete askatuko. Fase horretan, gainera, Israelek Filadelfia korridorearen (Gazako eta Egiptoko muga) kontrola utzi beharko luke.

David Mencer Israelgo Gobernuko bozeramaileak Filadelfia korridorea "ziurtatzearen garrantzia" azpimarratu du, "Hamasi arma-trafikoa eragozteko".

Ildo horretan, ostegun honetan, Israelgo funtzionario batek, anonimotasun baldintzapean, EFEri esan dio Israelek tropak korridorean mantentzeko asmoa duela akordioaren lehen fasean, indarrean sartzen bada.

Su-etenaren akordioak zatiketa eragin du Netanyahuren gobernuan. Itamar Ben Gvir Segurtasun Nazionaleko ministro ultraeskuindarrak iragarri du, onartuz gero, bere alderdia (Otzma Yehudit) koaliziotik erretiratuko dela.

Beste ministro israeldar batek, Amichai Chiklik (Netanyahuren Likud alderdikoa da), X sare sozialean Gobernua uzteko mehatxua egin zuen, baldin eta Israelek Filadelfia korridoretik alde egiten badu gerraren helburuak bete baino lehen.