Israelek Gazaren aurkako erasoak amaitzen dituenean Zerrenda AEBren "esku uztea" planteatu du Trumpek

Donald Trump AEBko presidenteak berriro defendatu du gaur Gaza palestinarrez husteko plana, eta azaldu du Israelek Zerrenda "entregatuko" lukeela bere erasoak amaitzen dituenean, palestinarrik gabeko Palestinako lurraldean "garapen handienetako eta ikusgarrienetako bat" abiarazteko.

Ordurako, palestinarrak, Chuck Schumer senatari demokrata barne, "toki seguruago eta politagoetan biziko dira, etxebizitza berri eta modernoetan", azaldu du Trumpek bere sare sozialean argitaratutako mezu batean.

AEBko presidentearen ustez, egitasmo polemikoarekin, gazatarrek "zoriontsu, seguru eta aske egoteko aukera izango lukete" beren herrialdetik kanpo, eta AEBko soldaduak bidaltzea "beharrezkoa ez" dela uste du. "Egonkortasuna izango litzateke nagusi eskualdean!", berretsi du.

Trumpek Zerrendaren gaineko kontrol estatubatuarraren ideia plazaratu zuen aste honetan, "Ekialde Hurbileko Riviera" sortzeko asmoz, Washingtonen emandako prentsaurreko batean, Benjamin Netanyahu Israelgo lehen ministroarekin batera.

Israelgo Gobernuak gaur agindu dio Armadari gazatarrak ateratzeko prestatzen hasteko. Horren harira, Palestinar Aginte Nazionalak Israelgo Gobernuari leporatu dio Palestinako herriaren aurkako "sarraski-gerran" beste pauso bat ematea.

NBEk dagoeneko ohartarazi dio Trumpi Nazioarteko Zuzenbideak debekatu egiten duela derrigorrezko edozein desplazamendu. Europako potentziek ere gogor kritikatu dute handi-mandi ultraeskuindarraren egitasmoa.

Mahmud Mardawi Hamas Palestinako erresistentzia mugimenduko goi-kargudunaren hitzetan, Trumpen plana "arrazista" da, eta "herri palestinarra deuseztatzea" du helburu. Horrela mintzatu da Trumpen proposamenen inguruan, izan ere, Israelgo agintariek bultzatutako "kolonizazio egitasmoen jarraipena" dela uste du, eta "herri palestinarrak bere aberria eta lurra izateko duen eskubidearekin amaitzearen" aldeko apustua dira.

"Gure herria suntsitzea eta eskualdeko geopolitika birformulatzea bilatzen duen ikuspegi arrazista erakusten du honek, sionismoaren interes kolonialentzat baliagarria izan dadin", adierazi du ohar batean.

Nabil Abu Rudeina Palestinar Aginte Nazionaleko Presidentetzako bozeramaileak gaur AEBko presidenteari erantzun dio Zerrenda ez dela "inbertsio proiektu bat". "Palestina, bere lurrarekin, historiarekin eta leku sakratuekin, ez dago salgai, eta ez da inbertsio proiektu bat", azpimarratu du Abu Rudeinak ohar batean.

"Herri palestinarrak eta bere buruzagiek ez dute onartuko 1948ko eta 1967ko hondamendiak errepikatzea", ziurtatu zuen bozeramaileak, Israelgo Estatuaren sorrerari eta Ekialdeko Jerusalemen okupazioari, hurrenez hurren, erreferentzia eginez.

Gainera, Abu Rudeinak ohartarazi duenez, palestinarrek "euren herria inbertsio proiektuen bidez zapuzteko diseinatutako edozein plan zapuztuko dute".

Bestalde, Errusiako Atzerri Ministerioak Ekialde Hurbileko "tentsioak areagotzea" leporatu dio AEBri, eta Trumpen proposamena "kaltegarria" dela esan du.

"Fase honetan izaera populista, fribolo edo probokatzailea duen edozein neurri kaltegarria da, eta ez du arazoa konpontzen lagunduko", adierazi du prentsaurreko batean Maria Zajarova Ministerioko bozeramaileak.

Ildo horretan, nabarmendu du adierazpen horiek berez tentsionatutako eskualde batean tentsioak areagotzen baino ez dutela laguntzen. "Orain garrantzitsuena behar dutenei laguntza humanitarioa ematea da", gogorarazi du, aldeei su-etena errespetatzeko eskatuz.

Era berean, Zajarovak adierazi du Mosku prest dagoela "modu aktiboan" parte hartzeko, nazioarteko beste eragile batzuekin batera, "Palestinako arazoari irtenbide iraunkor bat emateko bideak bilatzeko" lanean, TASS albiste agentziaren arabera.